Ил Дархан туһаайыыта Ил Түмэн Судаарыстыбаннай Мунньахха уонна өрөспүүбүлүкэ хас биирдии олохтооҕугар туһуланар. Туһаайыы ааһан эрэр сыл түмүктэрин таһаарар уонна кэлэр сылга саҥа туруоруллар соруктары быһаарар, өрөспүүбүлүкэбит сайдыытын торумнуур суолталаах.Биһиги бу туһунан нэһилиэкпит олохтоохторун санааларын ыйыталастыбыт.
Николай Петрович Романов, Дүллүкү нэһилиэгин баһылыга:
— Ил Дархан А. С.Николаев туһаайыытын сыала-соруга — Саха Өрөспүүбүлүкэтин сайдыытын хайысхаларын стратегическайдык быһаарыы, билиҥҥи турук туһунан дьоҥҥо-сэргэҕэ иһитиннэрии, инники соруктары туруоруу, реформалары саҕалааһын, норуоту кытта сибээһи бөҕөргөтүү, кэлэр кэм бэлитиичэскэй дьаһалын оҥоруу буолар. Бу национальнай интэриэстэри уонна сомоҕолоһууну тоһоҕолоон, сокуону оҥорор уонна толорор дьаһаллар хайысхаларын быһаарар сүрүн докумуон буолар.
Бастатан туран, доруобуйа харыстабылын систиэмэтэ, социальнай бырайыактар, олох таһыма, анал байыаннай дьайыы кыттыылаахтарын өйөөһүн, каадыры бэлэмнээһин, ыччаты патриотическай тыыҥҥа иитии туһунан иһитиннэрдэ.Салгыы уопсай балаһыанньаны олус чуолкайдык ырытан кэпсээтэ. Анал байыаннай дьайыы кыттыылаахтарыгар өйөбүл туһунан, онуоха биһиги волонтердарбыт, ийэлэрбит, уопсайынан, норуот оҥорор көмөтүн ордук бэлиэтээтэ. Үсүһүнэн, кэлэр сылга өссө элбэх оскуола, оҕо уһуйаана тутуллан, хаарбах дьиэттэн көһөрүү бырагырааммата салҕанан барыаҕын эттэ. Арктиканы сайыннарыы эмиэ биир сүрүн сорукпут. Арктика улуустарыгар авиабилиэккэ субсидия салгыы оҥоһуллуоҕун эттэ. Кэлэр сыл Үөһээ Бүлүү улууһун хаҥас өттүгэр сытар нэһилиэктэрбитигэр гаас ситимэ холбонор үлэтэ саҕаланыа диэн этиитин сэргии иһиттим.
Тихон Александрович Егоров, орто оскуола дириэктэрэ:
— Оскуолаларга төрүт тылы үөрэтии чааһа көҕүрүө суохтаах диэн этиитин, төрүт тылбыт сүмэтэ Сахабыт сирин тыатын дэриэбинэлэригэр баар диэн этиитин сэргээтим. Кэлэр 2026 сыл Сахабыт сиригэр култуура сыла биллэрилиннэ. Төрөөбүт төрүт тылбытын харыстыырга, норуот быһыытынан култуурабытын, үгэстэрбитин кэлэр көлүөнэҕэ иҥэрэн хаалларарга сөптөөх үлэлэр барыахтара диэн үөрдүбүт.
Николай Васильевич Васильев, Дүллүкүтээҕи култуура, сынньалаҥ киинин дириэктэрэ:
-Туһаайыыга өрөспүүбүлүкэбит сайдыытыгар, нэһилиэнньэ олоҕун тупсарыыга элбэх хайысхаҕа тыҥаан турар үгүс кыһалҕалар бэлиэтэммиттэрин сэргии аахтым.Ордук, саҥа үүнэр сыл «Култуура сылынан» биллэриллэрин сэҥээрдим. Чахчы да, «култуура» диэн биир тыл олус киэҥ өйдөбүллээх. Омук омук буолара диэн — бэйэ төрүт үгэстэрин сөргүтэн илдьэ сылдьыы, төрөөбүт төрүт тылы өрө тутуу буоллаҕа. Үрдүк култууралаах буоллахпытына, омук быһыытынан ордон эрэ хаалбакка, Саха буолан саҥалыы сайдыахпытыгар бүтэйдии эрэнэбин.»Суруллубут суоруллубат!» диэн этии сахаларга баарын бары бэркэ билэбит. Онон, сурукка баар былааннар олоххо киирэн туолан иһэллэригэр эрэнэбит.
Анастасия Григорьевна Семенова, история учуутала:
— 2026 сылга улууспут Бүлүү өрүс уҥуор нэһилиэктэригэр газ ситимэ тардыллыахтаах диэн этиини биһирии иһиттим. Оттук боппуруоһа быһаарыллан, дьон олоҕо-дьаһаҕа чэпчиирэ дьоһуннаах. Оҕо, ыччат эргиччи сайдыылаах буоларыгар, үөрэх-билии хаачыстыбата үрдүүрүгэр аналлаах саҥа сайдыы кииннэрин тутуулара былааҥҥа баарын үөрэхтээһиҥҥэ аналлаах этииттэн олус биһирээтим. Саха Өрөспүүбүлүкэтин Ил Дархана Айсен Сергеевич Николаев этиитин түмүгэр бар дьонугар өрөспүүбүлүкэбит сайдыытыгар киллэрэр кылаатын иһин махтанна.
Айыына Петрова, Сааскыйа Васильева, Ньургун Романов, Игорь Ан, «Эрчим» медиакиин, Дүллүкү, Үөһээ Бүлүү