Бүгүн, тохсунньу 28 күнүгэр, «Мы единство-биир сомоҕо» смена оҕолоро, «Кэскил» медиа-оскуола юнкордара, 6 буолан, СӨ үөрэҕин уонна билимин миниистирин бастакы солбуйааччытын Ньургун Михайлович Павловы кытта көрүстүбүт. Саха сирин араас муннуктарыттан кэлбит юнкордар араас боппуруостары ыйыттылар. Ньургун Михайлович биһиги ыйытыыларбытыгар толору, санаатын сиһилии быһааран эппиэттээтэ. Мин бу көрсүһүүгэ ОГЭ (сүрүн судаарыстыбаннай эксээмэн) уларыйыыларын уонна биһиги нэһилиэкпитигэр ОГЭ-ны туттарар пуун туһунан ыйыталастым.
— Бу үөрэх дьылыгар ОГЭ туттарарга туох уларыйыылар киирдилэрий? 9-с кылааһы бүтэрэр үөрэнээччилэр туохха бэлэм буолуохтаахпытый?
- Сыллата ыытыллар сүрүн судаарыстыбаннай эксээмэҥҥэ улахан уларыйыы киирбэтэ, барыта уруккутун курдук. Эксээмэн буоларын курдук, ыытылла турар, быйыл ханнык күннэргэ эксээмэн буолара барыта номнуо биллэн турар. Бу информация туһунан үөрэх уонна билим министерствотын сайтыттан билиэххэ сөп. Эксээмэн ис хоһоонугар уларыйыылар киирдилэр. Учууталларгыт эһигини кытта бу сыл аҥаарыгар ханнык уларыйыылар киирбиттэринэн бэлэмнии сылдьаллар. Сүрүннээн этэр эбит буоллахха, 2 сүрүн эксээмин баар — математика уонна нуучча тыла. Бу эксээмэннэри кылааска хас оҕо баарынан бары эбэһээт туттарыахтаахтар. Ону таһынан, үөрэнээччи 2 предмети талыахтаах. Холобур, математикаҕа хантан ордук бэлэмнэниэххэ сөбүй, ханнык сорудахтар кэлэллэрий диэн ыйытыыга «Федеральный институт педогогических измерений» диэн саайка киириэххэ сөп. Эксээмэн сорудаҕын оҥорор дьон бу институтка үлэлииллэр. Ол иһин, 9 кылаас үөрэнээччилэрэ эксээмэҥҥэ бэлэмнэнэр буоллаххытына ити саайка «открытый банк задач» диэн бэлиэҕэ киирэн, ханнык сорудахтар кэлиэхтэрин сөбүн көрөҕүт. Хас биирдии үөрэнээччи онно киирэн көрөн, бэлэмнэниэн сөп.
— Биһиги Хоро орто оскуолатыгар ОГЭ (сүрүн судаарыстыбаннай эксээмэни) туттарабыт. Оҕолор сарсыарда эрдэ 5-6 чааска айаннаан тиийэн туттараллара табыгаһа суох. Инникитин эксээмэн туттарар пууннар миэстэтигэр арыллыахтара дуо?
- Сыллата ОГЭ уонна ЕГЭ туттарар пууннар биһиэхэ сыллата бигэргэнэллэр. Хас биирдии пууннар бэйэлэрэ ирдэбиллээхтэр. Ирдэбил арааһа элбэх. Пуун ирдэбилгэ барытыгар эппиэттиир, саҥа тутуллубут оскуола, эксээмэҥҥэ 10-тан элбэх оҕо ОГЭ туттарар буоллаҕына, манна арыллыан сөп диэн ирдэбиллэр бааллар. Бу ирдэбиллэри үөрэх министиэристибэтэ көрөн быһаарар. Эһиги, Үөһээ Бүлүү улууһун үөрэҕин салалтата биһиэхэ тахсаннар бу оскуолаҕа пуун арыйыахпытын баҕарабыт диэн сайаапка биэрэллэр. Биһихэ биэрдэххитинэ, биһиги көрөммүт, бары ирдэбилгэ эппиэттиир буоллаҕына пуун арыйа сатыыбыт, миэстэтигэр усулуобуйа тэрийэ сатыыбыт. Боппуруоскун иһиттим, ыйыталаһыахпыт. Эн эмиэ бэйэҥ, улуус, оскуола диэриэктэрин көрсөҥҥүн, учууталларгын, үөрэх салалтатын үлэһитин кытта кэпсэтэн бу боппуруоскун эмиэ ыйыталаһа сылдьаар.
Маннык боппуруос биэрэр олус эппиэтинэстээх уонна долгутуулаах эбит. Дойдубар, Дүллүкүгэ, бардахпына истибиппин-көрбүппүн хайаан да дириэктэрбэр, учууталларбар, оҕолорбор тириэрдиэм.
Айыына Петрова, IX кылаас, Дүллүкү орто оскуолата, «Эрчим» медиакиин, Үөһээ Бүлүү