Быйылгы XXI «Манчаары оонньуулара» спорт национальнай көрүҥнэригэр өрөспүүбүлүкэтээҕи спартакиада уратыта тугуй?
Бастакытынан, быйылгы оонньуулар хамсыгынан сибээстээн көрөөччүтэ суох ыытыллаллар. Күрэхтэһиини онлайн эрэ көрөр кыахтанныбыт. Онон спартакиада хаамыытын Интернет социальнай ситимнэригэр, сайтарга, Саха сирин киин ханаалыгар көрүөхпүт. Манчаары оонньууларын үөрүүлээх арыллыыта от ыйын 7 күнүгэр киэһээ 21 ч. «Саха» НКИК быһа холбонуутугар көстүөҕэ.
Иккиһинэн, быйылгы Манчаары оонньууларын үөрүүлээх арыллыытыгар Россия спордун миниистирэ Олег Васильевич Матыцин уонна РФ Олимпийскай комитетын президенэ Станислав Алексеевич Поздняков кыттыыны ылыахтара.
Быйылгы оонньууларга 1800 тахса спортсмен кыттара, 174 мэтээл оонньоноро күүтүллэр. Бу эмиэ бэйэтинэн рекорд буолар! Наҕараадаланар мэтээллэр быйыл эмиэ уратылар. Ол курдук, мэтээллэргэ Манчаары оонньууларын уонна Горнай улууһун символлара киирбиттэр: мэтээл ортотугар Горнай улууһун гербэтэ — тайах, Манчаары Баһылай атынан көтүтэн иһэрэ көстөр. Уҥа өттүгэр кыайбыт миэстэтэ суруллубут. Хаҥаска — Аал-Луук Мас, Сиинэ үрэх дизайннаах. Ону тэҥэ мэтээлгэ спорт национальнай көрүҥнэрэ ойууламмыттар.
Быйылгы Манчаары оонньууларын культурнай программата эмиэ ураты. Аан бастакытын от ыйын 8 күнүгэр өрөспүүбүлүкэтээҕи «Кырсаада Куо-2021» кэрэ көстүү уонна спорт күрэҕэ 16-тан-25 диэри саастаах спордунан дьарыктанар кыргыттарга ыытыллыаҕа. Номнуо билигин @kyrsaada_kuo Инстаграм сирэйигэр «Мисс зрительских симпатий» номинацияҕа куоластааһын ыытылла турар.
Горнай улууһа 90 сааһын көрсө уонна быйыл биллэриллибит Доруобуйа сылыгар аналлаах аан бастакытын ыытыллар «Тоҕус туруйа уолаттар, сэттэ кыталык кыргыттар» диэн 17 түһүмэхтэн турар этноэстафета улуустартан күрэххэ кэлбит хамаандалар истэригэр ыытыллыаҕа.
Маны таһынан Манчаары оонньууларын көрсө Горнай улууһун дьаһалтатын, Духуобунас киинин, үөрэх салалтатын салаатын кытта холбоһон «Кэскил» оҕо бэчээтин кыһата «Кыайыыга кынаттыыр кэрэ дойдум» диэн Горнай улууһун туһунан дьоҕус, сүрдээх киэҥ, дириҥ ис хоһоонноох энциклопедията «Төрөөбүт улууспут — оҕолор харахтарынан» анал серияҕа бэчээттэнэн тахсан олохтоохторго, ыалдьыттарга ураты бэлэх буолла.
Сырдаппыппыт курдук, быйылгы 21-с «Манчаары оонньууларын» cпартакиадатын талисманнарынан Тургун диэн тайах, Бэргэн диэн бизон уонна Кырсаада диэн сибэкки буоллулар. Талисманнар фигуралара Бэрдьигэстээххэ Кыайыы болуоссатыгар киэркэйэн турдулар.
Маны таһынан аан бастакытын Манчаары оонньууларын сырдатар https://manchaarygames.ru/ саҥа сайт арылынна. Онон оонньуу хаамыытын бу сайт нөҥүө эмиэ билсэ олоруоххут.
Спартакиада ыытыллар оройуонугар саҥа тутуулар, стадионнар, сквердэр, пааматынньыктар арыллаллар. Ол да иһин тэрийэр улуус аҕыйах кэм иһигэр лаппа тупсар. Горнай онтон эмиэ хаалсыбата. Улуус киинэ Бэрдьигэстээх биллэ киэркэйдэ.
Онон саха норуотун сомоҕолуур Манчаары оонньууларын үөрэ-көтө көрсүөххэйиҥ, үрдүк таһымҥа ыытыаххайыҥ, дьоҥҥо-сэргэҕэ сиһилии сырдатыаҕыҥ диэн ыҥырабыт.
21-с төгүлүн ыытыллар «Манчаары оонньуулара» спорт национальнай көрүҥнэрин спартакиадатын спортсменнарыгар ситиһиини, чаҕылхай киирсиилэри баҕарыаҕыҥ! Ким күүстээх — ол кыайдын!
Суруйда Анна СЛЕПЦОВА.