Ыраах хоту сытар муустаах муоралаах Булуҥ улууһун Бороҕон орто оскуолатын үөрэнээччилэрэ сайын аайы ыстаадаҕа сайылаан, табаһыт идэтигэр уһуйуллаллар.
Быйыл эмиэ бэһиэ буолан, киэҥ нэлэмэн ыстаада сиригэр оҕолор дьоннорун кытары сайылаатылар. Чуум үлэһитинэн уонна иитээччинэн оскуола библиотиэкэрэ Мирена Яковлевна Дьячковская хаһыс да сылын үлэлиир. Оҕолор ыарахан үлэттэн чаҕыйбаттар, улахан дьону кытта тэҥҥэ таба манаһаллар, оттор мас, иһэр уу таһыытыгар киминэн да солбуллубат үлэһиттэр.
Алеся Кривошеева, Айна Тимофеева, оҕо эрдэхтэриттэн ыстаадаҕа сылдьыбыт буолан, номнуо уопуттаах табаһыттар. Онтон Кирилл Романов бастакы сылын сылдьар, ол да буоллар дьоһун үлэһит быһыытынан бэйэтин көрдөрдө. Сайаана Осипова, Миша Дьячковскай дьиэ ис-тас үлэһиттэрэ. Киэһэ таба кэллэҕинэ, күрүөҕэ хаайсар үлэлээхтэр. Оҕолор бары бииргэ олорон, араас минньигэс, тотоойу аһы астыыллар. Саҥа аахпыт кинигэлэрин ырытыһаллар. Туох интэриэһинэйи көрбүттэрин, булбуттарын, бэлиэтэммиттэрин бэрийэллэр. Ити курдук оҕолор күн солото суох үлэни уонна сынньалаҥы бииргэ дьүөрэлии туталлар.
Хотугу сиргэ халлаан сөрүүкүйэн, баһаар буруота да элбээн оҕолор дьиэлэрин, табаарыстарын ахталлара ама кэмнээх буолуо дуо? Ол да буоллар, туох да диэбит иһин, уһун унньуктаах кыһын устата ыстаадаларын суохтуохтара турдаҕа эбээт…