Булуҥ улууһун Бороҕон агрооскуолатын оҕолоро сайыҥҥы уһун сынньалаҥнарын туһалаахтык атаараары, ыам ыйын 23 күнүгэр ыстаадаларыгар айаннаатылар. Оскуола дириэктэрэ Жанна Прокопьевна Осипова бу туһунан кэпсиир.
— Булуҥ улууһун Бороҕон агрооскуолатын табаһыт оҕолоро үөрүү-көтүү, сүпсүлгэн бөҕө буолан, үс буранынан уһун айаҥҥа туруннулар. Оҕолор үөрэхтэрин түмүктээн, бары «хорошист» буолан, үөрэн-көтөн, бэлэх-туһах тутан, үлэһит дьон быһыытынан тэрээһиннээхтик хомуна-тэринэ охсон, доҕотторун-атастарын кытта бырастыылаһаат, олохтоон миэстэлэригэр олорон, киэҥ нэлэмэн туундараларын устун айаннаан куугуната турдулар.
Кинилэри бары эппиэтинэһи ылынан, куруутун бииргэ сылдьар учууталлара М.Я Дьячковская салайан илдьэ барда. Биһиги, учууталлар, төрөппүттэр , оҕолор кинилэри өргө диэри ымсыыра көрө хааллыбыт.
Быйыл ыарыынан сибээстээн, бобуу- хаайыы туран, ыстаадаҕа аҕыйах оҕо барар буолбута да, сылдьа үөрүйэх оҕолор, сорохторо ытаан да туран, талаһыылаах ыстаадаларыгар айаннаатылар. Оҕолор улаатан, күүс -сэниэ ылынан, үлэҕэ да, үөрэххэ да өрүү инники күөҥҥэ сылдьаллара киһини үөрдэр. Кинилэргэ көрдөөх- нардаах сынньалаҥы, үлэҕэ ситиһиини, этэҥҥэ буолууну баҕарыаҕыҥ.
