IT-салаа уонна сайдыы үнүстүтүүтүн үлэһиттэрэ бэлэмнээбит минньигэс ураты бэлэхтэрин Булуҥ улууһугар ыыттылар. IT-пааркатын, Дьокуускай Технопааркатын, Саха сирин сайдыытын холбоһугун үлэһиттэрэ, венчурнай хампаанньалар ыыппыт кэһиилэрин Булуҥ улууһун оҕолоро тутуохтара. Бу туһунан СӨ Бырабыыталыстыбатын уонна Баһылыгын дьаһалтатын пресс-сулууспата иһитиннэрэр.
Саҥа дьыллааҕы бэлэхтэр Тиксии бөһүөлэгэр, Күһүүр, Таймылыыр, Найба, Быковскай нэһилиэктэригэр тиийиэхтэрэ. Оҕолор минньигэс бэлэхтэр хааларыгар IT-generator хампаанньата оҥорбут 3D-дьоруойдаах Инстаграм-мааскатын QR-код көмөтүнэн булуохтара диэн тэрийээччилэр этэллэр.
«IT-салаа уонна сайдыы үнүстүтүүтүн үлэһиттэрэ Булуҥ улууһун оҕолоругар бэлэх оҥордулар. Резиденнэр оҥорон таһаарбыт онлайн оонньуулаах минньигэс бэлэхтэрэ кыра да, орто да саастаах оҕолорго интэриэһинэй буолуо диэн эрэнэбин», — диэн этэр СӨ инновацияҕа, цифровой сайдыыга уонна инфокоммуникационнай технологияларга миниистир солбуйааччыта Георгий Андреев.