Сата Ивановна Ноева салайааччылаах бастакы кылаас үөрэнээччилэрэ маҥнайгы кинигэлэрин бүтэрэр «Быраһаай, букубаар!» бырааһынньык буолан ааста.
Сата Ивановна миигин Амелияны, Айыллаананы ыҥыран, тэрээһиннэ ыытыһыҥ диэн эппитигэр олус долгуйбутум. Кини мин бастакы учууталым. Хаһан эрэ биһиэхэ эмиэ букубаардыын бырааһайдаһар бырааһынньык буолан ааспыта.
Учууталбыт көрдөһүүтүн ылынан, 5-с кылаас кыргыттара Айыллаана, Амелия уонна мин «Букубаар» кэпсээннэрин оонньоон көрдөрдүбүт, «Букубаар», «Саха тыла», «Литература ааҕыыта» оруолларын толордубут.
Кырачаан үөрэнээччилэр буукубалар туһунан хоһооннору эттилэр, ырыа ыллаатылар.
«Мичил» уһуйаан сэбиэдиссэйэ Мария Анатольевна, иитээччилэрэ Яна Иннокентьевна, дириэктэри үөрэх чааһыгар солбуйааччы Мария Евсеевна, алын сүһүөх учууталларын аатыттан Айталина Александровна, төрөппүттэр олус долгутуулаах эҕэрдэ үтүө тылларын эттилэр. Олус интэриэһинэй кинигэлэри, салҕыы үөрэнэллэригэр туһалаах кэһиилэри туттардылар. Төрөппүттэр олус үчүгэй
«Букубаар» ойуулаах тордунан күндүлээтилэр.
Бастакы кылаас үөрэнээччилэригэр үтүө доруобуйаны, үөрэхтэригэр ситиһиини баҕарабыт.
Мин санаабар, «Бырааһай, букубаар!» тэрээһин олус үчүгэйдик ааста, маҥнайгы кылаас үөрэнээччилэригэр бу күн туһунан үтүө өйдөбүл хаалбыта буолуо диэн эрэнэбин.
Сайаана ФЕДОРОВА, V кылаас,
С.Д. Флегонтов аатынан Хадаар орто оскуолата, Чурапчы