Бу күннэргэ Н.Е. Мординов-Амма Аччыгыйын аатынан Харбалаахтааҕы үөрэхтээһин холбоһугар кылаас таһынан үлэ ньиргиччи бара турар.
Ол курдук, балаҕан ыйын 24 күнүгэр холбоһук 1-11 кылааһын үөрэнээччилэрэ үгэс буолбут күһүҥҥү субботникка күргүөмүнэн тахсан үлэлээтибит. Үөрэнэр оскуолабыт таһын, оскуола эҥээр сыста сытар нэһилиэкпит сирин ыраастаатыбыт. Хата, халлаан туран биэрэн абыраата.
Төрдүс кылаас үөрэнээччилэрэ нэһилиэк субботнигар кыттыһан, төрөппүттэрин кытта пааркаҕа бузина талаҕы олортулар. Учууталлара Татьяна Семеновна Севостьянова оҕолоро үтүө дьыалаҕа бэйэлэрин баҕаларынан кыттыбыттарыттан олус үөрдэ!
Бэҕэһээ күн уота чаҕылыччы тыган, сайыҥҥылыы сылаас күн турбута. «Кросс нации» бүтүн Арассыыйатааҕы тэрээһиҥҥэ кыттан, холбоһук бары үөрэнээччилэрэ анал дистанциялары сүүрдүлэр. Кырачааннарга — кыргыттарга: Горохова Виолетта (2кыл.) бастакы, Ананьева Мичийэ (1кыл.) иккис, Кириллина Сандаара (2кыл.) үһүс буоллулар.
Уолаттарга: Нестеров Диар бастакы, Захаров Айтал иккис, Сотрудников Алеша үһүс (бары иккис кылаастар) кыайыы үөрүүтүн биллилэр.
Үөрэнээччилэр бары көхтөөхтүк кытыннылар. Сүүрүү иннинэ эти-хааны уһугуннаран, эрчиллиилэри оҥордубут.
Улахан кылаастар ситиһиилэрин таблицанан ыытабыт.
Онон үлэни, сүүрүүнү тэҥҥэ тутан, оҕолор күн бокуойа суох сырыттыбыт. Бу барыта киһиэхэ олус туһалааҕын бары өйдүүбүт.
Виолетта Петрова, 8 кылаас үөрэнээччитэ, Таатта Харбалаах.