Саха литературатын төрүттээбит суруйааччы Алексей Елисеевич Кулаковскай-Өксөкүлээх Өлөксөй “Оттоку олук алгыһа” айымньытын ааҕан баран, бэйэм санаабын суруйарга сананным. Кини бу айымньытыгар саха норуота, саха ыччата инникитин хайдах дьаһанан олордоҕуна, атын омуктартан итэҕэһэ суох олоруон сөбүн олук ууран суруйар. Биһиги, аныгы ыччат үөрэхтээх, сайдыылаах атын омуктары кытары тэҥҥэ кэпсэтэр, киэҥ билиилээх буолуохтаахпыт диэн алҕаабыта, билигин туолан сайдан иһэр.
Биһиги өбүгэлэрбит былыр-былыргыттан сүөһү-сылгы ииттэн тыыннаах ордубуттарын, ол төрүт дьарыкпытын төһө да аныгы кэмҥэ олордорбут, хаһан да сүтэриэ суохтаахпытын эппит. Биһиги саха омук бэйэбит төрүт аспытын аһыахтаахпытын тоһоҕолоон этэр. Билигин эдэр ыччат тыа сиригэр олохсуйан эти, үүтү, үрүҥ аһы элбэтэн сөпкө аһааһыны киллэрэн эрэллэр.
Ыарахан кэмнэргэ киһи санаатын хаһан даҕаны саппаҕырдыбакка, албын суолу батыспакка сылдьарын курдук алҕаабыт. Атын омук тылын үөрэтэн, билэн, сахалыы төрөөбүт тылбытын тэҥҥэ сайыннаран иһиэхтээхпитин тоһоҕолоон эппитэ билиҥҥи кэмҥэ олус туһалаах. Тыла суох омук, омук буолбат, симэлийэн хааларын бигэргэтэр.
Биһиги эдэр ыччат бу хоһоону сүбэ, инники олохпутугар сөптөөх хайысхалары ыйан биэрбитин ылынабыт, сирдьит оҥостобут уонна дьыаланан дакаастыыбыт.
Сахабыт Сирэ суон сураҕыран, кэнчээри ыччата кэпсээҥҥэ киирэн, бу алгыс суолтата үйэттэн уйэҕэ умнуллубатын!
Лилия АКИМОВА, XI кылаас,
“Ориентир” медиакиин эдэр кэрэспэдьиэнэ
Г.И. Чиряев аатынан Бүлүү 1-кы №-дээх орто оскуолата