Күһүҥҥү сынньалаҥҥа барыах иннинэ, алтынньы 25-26 күннэригэр, Уус Алдан улууһун А.Н. Жирков аатынан Бэйдиҥэ орто оскуолатыгар идэҕэ туһаайар көрсүһүү ыытылынна. Манна уопсайа алта оскуола муһунна. Ол курдук, Уус Алдантан Бэйдиҥэ, Арыылаах, Курбуһах уонна Майаҕас, Мэҥэ Хаҥалас улууһун Матта уонна Чурапчы улууһун Алаҕар орто оскуолаларыттан актыбыыстар кыттыыны ыллылар. Биһиги оскуолабытыттан бу тэрээһиҥҥэ үс оҕо кытынна: «Алаҕар кэскилэ» оскуола актыыбыттан Арчылаан Барашков, Родион Мохначевскай уонна актыып бэрэссэдээтэлэ Сандал Мохначескай.
Тэрээһини Хотугулуу илиҥҥи федеральнай университет 18 устудьуона кэлэн ыыттылар. Кинилэр оҕолорго университет бары салааларын билиһиннэрдилэр, ханнык эксээмэннэри туттаран киирэри, үөрэх мэктиэлэрин, ыарахаттарын, устудьуон олоҕун сиһилии кэпсээтилэр. Сэһэргэһии кэмигэр оҕолор интэриэһиргиир боппуруостарын ыйытан, эппиэт ыллылар.
Салгыы Бэйдиҥэ кулуубугар устудьуоннар уонна актыыптар бэйэни билиһиннэрэр кэнсиэрдэрэ буолла. Бары да чаҕылхай оҕолор кэлэн, бөһүөлэк олохтоохторун сэргэхситтилэр.
Кэнсиэр кэннэ оскуолабытыгар төннөн, коммунарскай түмсүүбүт саҕаланна. Устудьуоннар оҕолорго квест оонньууну уонна уоттаах-күөстээх дискотеканы ыыттылар.
Бу буолан ааспыт көрсүһүү атын улуус актыыптарын үлэлэрин кытта уопут атастаһыытын, саҥа көрүүнү, идиэйэлэри үөскэттэ. Мантан ыла айар айымньылаах үлэбит өссө үчүгэйдик тэриллиэ.
Арчылаан Барашков, IX кылаас,
«Алаҕар кэскилэ» медиа киин,
Алаҕар орто оскуолата,
Чурапчы