Олунньу 15 күнүгэр Боронук орто оскуолатыгар Ийэ тыл уонна сурук-бичик нэдиэлэтигэр анаммыт «Саха тылын төһө билэҕин?» диэн эстафета буолан ааста.
Саха тылын учууталлара А.Т. Стручкова уонна Л.М. Горохова орто сүһүөх оҕолоругар анаан саха тылын аныгы оҕолор төһө билэллэрин бэрэбиэркэлиир, ону таһынан билиилэрин өссө чиҥэтэллэрин туһугар сүрдээх үчүгэй, оҕо-аймахха сөптөөхтүк саха тылын арыйар-үөрэтэр оонньуу ыыттылар.
Оскуола орто саастаах оҕолоро сүүс быраһыан кыттыбыттарын бэлиэтиир тустаахпын.Ол курдук, «Дьоҕур» уонна «Дьулуур» күөн көрсөн сүрдээх үчүгэйдик сорудахтары толорон, ону таһынан «оҕо атаҕа — ыт атаҕа» диэбиттии түргэттэрин көрдөрдүлэр. Оонньуу сорудахтарынан: туохтуурдары булуу, этиини тэнитии, аат тыллары наардааһын уо.д.а интириэһинэй сорудахтара.Ону тэҥэ «хас биирдии тыла биир дорҕоонтон тахсар саамай уһун этии» диэн уустук сорудаҕы кытта биһиги үөрэнээччилэрбит ыарырҕаппакка толорбуттара, бу сорудахтар түмүктэринэн оҕолор уус-уран тыллара, этии тутулун билиилэрэ көстөр.
Ол курдук, оонньуу түмүгүнэн «Дьоҕур» хамаанда бастакы үрдэли ылбыта. Оҕолор бары минньигэс бирииһинэн наҕараадаламмыттара. Учууталларбытыгар Любовь Михайловнаҕа, Акулина Трофимовнаҕа бу курдук сүрдээх үчүгэй тэрээһини ыытан оҕолор билиилэрин кэҥэппиттэригэр уонна инниккитин даҕаны бу курдук тэрээһиннэри ыытыахтара диэн туран махталбытын тиэрдэбит.
Лена Заборовская, 11 кылаас үөрэнээччитэ, Боронук, Үөһээ Дьааҥы.
keskil14.ru