Бүгүн Сэһэн Ардьакыап аатынан Уус Алданнааҕы историяны уонна кыраайы үөрэтии түмэлигэр биллиилээх Государственнай деятель Н.Н. Окоёмов 125 сааһын туолбут үөрүүлээх күнүгэр «Килбиэннээх көлүөнэ чаҕылхай ыччата» диэн быыстапка арылынна.
Манна СӨ Национальнай архыыбын, Курбуһах нэһилиэгин уонна улуус музейын фондаларыттан матырыйааллар турдулар.
Н.Н. Окоёмов Саха сиригэр Сэбиэскэй былаас бастакы күннэриттэн олохтоноругар улахан кылааты уурбут киһи. Бороҕон улууһун ревкомун бэрэссэдээтэлинэн ананар, бастакы комсомольскай ячейканы уонна тыа сиринээҕи кооперативы тэрийбит. Н.Н. Окоемов тус дьыалатын матырыйааллара Национальнай архыып фондатыгар хараллан сыталлар.
Бу тэрээһиҥҥэ улууспут бэтэрээннэрэ кэлэннэр, быыстапка арыллыытын дуоһуйа көрдүлэр, иһиттилэр. Улууспут олохтоохторо уонна ыалдьыттара бу быыстапканы көрүөххүт диэн эрэнэбит.
Алина Гриц, Дуня Сивцева,
Мүрү 1 №-дээх орто оскуолатын выпускниктара