Бу күннэргэ Уус Алдан Бороҕонугар Саха сирин норуоттарын VIII спортивнай оонньуулара буола тураллар. Ол туһунан сырдатан суруйар ситимнэри кэтээн көрөр дьон Мүрү 1 №-дээх орто оскуолатын VI кылааһын үөрэнээччитэ Айхал Неустроев Ил Дарханы кытта илии тутуһан билсибитин уонна кэккэлэһэ олорон оонньуулары көрбүтүн туһунан аахпыт буолуохтааххыт. Биһиги Айхал туһунан билиэхпитин баҕаран, сибээскэ тахса сырыттыбыт.
— Айхал, эн суруккар Айсен Сергеевич эппиэттииригэр төһө эрэллээх этиҥ?
— Эрэллээх этим.
— Билсиһиигит туһунан сиһилии кэпсиэҥ дуо?
— Церемония саҕаланыан иннинэ миэстэбин булан олордубуттара. Ыытааччы куолаһа убаастабыллаах Ил Дарханы, улууспут Аҕа баһылыгын уонна миниистирдэри көрсүөҕүҥ диэн саҥарбытыгар олус долгуйбутум. Аттыбар кэлээт, миэхэ илиилэрин биэрэн дорооболоһон, кэпсэтэн, билсэн барбыттара, хаартыскаҕа түспүппүт. Улахан салайааччылар эрээри олус боростуойдук, үөрэ-көтө кэпсэппиттэриттэн наһаа үөрбүтүм. Айсен Сергеевич ханна үөрэнэрбин, тугунан дьарыктанарбын ыйыталаспыта уонна миэхэ спартакиада сабыллыытыгар билиэт бэлэхтээбитэ. Ол кэннигэр илии баттаан баҕа санаатын суруйбута.
— Олус үчүгэй! Иллэҥ кэмҥэр тугунан дьарыктанаҕын?
— Волейболунан. Быйыл күһүҥҥэттэн мас тардыһыытынан дьарыкпын саҕалыахпын баҕарабын.
— Туох ситиһиилэрдээххин?
— Нуучча литературатыгар өрөспүүбүлүкэтээҕи “Розовый Пегас” олимпиада лауреатабын, нуучча тылыгар норуоттар икки ардыларынааҕы “Далевский диактант” акция призерабын, Оскуола бибилэтиэкэтин күнүгэр аналлаах презентация куонкуруһугар 2-с миэстэлээхпин, өрөспүүбүлүкэтээҕи ыһыах чэрчитинэн оскуола оҕолоругар аналлаах ааҕыы күрэҕэр “Дорҕоонноох ааҕааччы” анал аат хаһаайынабын, өрөспүүбүлүкэтээҕи уонна улуустааҕыы ааҕыы күрэхтэрин кыттыылааҕабын уонна призерабын, пионербол күрэҕин призерабын, оскуолабар волейбол сүүмэрдэммит хамаандатын чилиэнэбин.
— Саамай сөбүлүүр предметтэрин ханныктарый?
— Физкультура, география, нуучча уонна саха тыллара.
— Оскуоланы бүтэрдэххинэ ханнык идэни баһылыыр санаалааххын?
— Санкт-Петербург куоракка үөрэнэ барыахпын баҕарабын. Идэбин чуолкайдык быһаарына иликпин.
— Эн санааҕар патриот диэн кимий?
— Дойдутун харыстыыр, көмүскүүр, өрө тутар киһи дии саныыбын.
— Бэйэҕин 20-чэ сылынан хайдах көрөҕүн?
— Төрөөбүт дойдубар, улууспар туһалаах үлэһит киһи буолуохпун баҕарабын. Саха сирин норуоттарын VIII спортивнай оонньуулара, мин олорор улууспар ыыттылларыттан олус үөрэбин уонна киэн туттабын.Оонньуу үөрүүлээх аһыллыытын олох биир тыынан көрдүм.Наһаа үчүгэй.Дойдум дьонунан өссө киэн тутуннум.
Кэпсэттэ Вера Петрова