Дэгиттэр талааннаах сүдү уус, ойууһут, бөлүһүөк, СӨ норуотун маастара, СӨ култууратын үтүөлээх үлэһитэ, Былатыан Ойуунускай аатынан СӨ Судаарыстыбаннай бириэмийэтин лауреата, СӨ култууратын туйгуна, СӨ Духуобунаһын академиятын академига, РФ уопсай үөрэхтэһиинин бочуоттаах үлэһитэ, СӨ үөрэҕириитин туйгуна, СӨ, Таатта улууһун, Баайаҕа нэһилиэгин Бочуоттаах олохтооҕо, саха норуотун саарына, тапталлаах чулуу уола Борис Федорович Неустроев — Мандар Уус 80 сааһын туолбут үбүлүөйдээх күнүн Улуу Туймаада хочотугар, өрөспүүбүлүкэбит килбэйэр киинигэр — Дьокуускайга бэлиэтиир, айхаллаах аатын ааттыыр, норуотун иннигэр үлүскэннээх үлэтигэр, үйэлээх үтүөтүгэр, килбиэннээх кэрэ бэйэтигэр сүгүрүйэр ытык күн, дьоро түһүлгэ үүннэ.
Кэми-кэрдиини кытта сүтэн, симэлийэн, умнуллан эрэр норуот прикладной искусствотын көрүҥнэрин сүтэрбэт-симэлиппэт туһуттан хорсуннук турууласпыт, ылсыбыт дьыалатын туһугар ууга да, уокка да киирэрин кэрэйбэтэх фанат-энтузиаст, түөрт уонча сыл муспут баайын чинчийэн, сааһылаан, системаҕа киллэрбит, былыргы өспүт үгэһи тилиннэрбит, уус идэтин, уһаныы үгэстэрин тыыннаабыт, саҥа таһымҥа таһаарбыт, саҥа көлүөнэлэри уһуйбут, чөллөөх, үтүө олоххо, кэрэҕэ сирдээбит дэгиттэр талааннаах уһулуччулаах уус, саха норуотун этитиилээх ойууһута, саха ойуутун-бичигин, оһуорун-мындырын сөргүтэн, тилиннэрэн үйэтитээччи, мындыр уһуйааччы, настаабыннык, төрдүнү көрөр, ырааҕы анаарар, өркөн өйдөөх бөлөһүөк – Борис Федорович Неустроев-Мандар Уус.
Бүгүн, ахсынньы 10 күнүгэр, «Үлэ кыбаартала» креативнай кластерга бүтүн Саха сирин киэн туттар Ытык Киһитэ, Саха норуотун духуобунай сирдьитэ, этнограф, уһуйааччы Б.Ф. Неустроев-Мандар Уус 80 сааһыгар аналлаах «Мандар Уус — саха норуотун култууратын үйэлээх илдьитэ» диэн үбүлүөйдээх тэрээһин буолан ааста.
Тэрээһин үөрүүлээх арыллыыта саха омук сиэринэн, үйэлээх үгэһинэн алгыһынан саҕаланна.
Бүгүҥҥү бэлиэ күҥҥэ СӨ Бырабыыталыстыбатын Бэрэссэдээтэлэ Кирилл Евгеньевич Бычков, СӨ Бырабыыталыстыбатын бэрэссэдээтэлин солбуйааччы Сергей Васильевич Местников, култуура уонна духуобунай сайдыы миниистирэ Афанасий Иванович Ноев, Дьокуускай куорат баһылыга Евгений Николаевич Григорьев ыалдьыттаатылар.
Борис Федорович Неустроев-Мандар Ууска СӨ Бырабыыталыстыбатын Бэрэссэдээтэлэ, үбүлүөйдээх тэрээһиннэри бэлэмнээһиҥҥэ уонна ыытыыга тэрийэр кэмитиэт бэрэссэдээтэлэ Кирилл Евгеньевич Бычков эҕэрдэ тылын эттэ уонна «Мандар Уус» саха олоҕун кэлим түмэлин үлэһиттэригэр Махтал суруктарын туттарда:
Ытык киһибит Борис Федорович көһөҥө талаанынан үйэлээҕи айбыт-туппут
дириҥ суолталаах сүдү үлэтинэн, дьиҥ сахалыы сиэрдээх
майгытынан, киһилии кэрэ бэйэтинэн саха норуотун
тапталын ылыан ылбыт, саха норуотун түмэр, кэлэр кэнчээри ыччакка сүдү улахан нэһилиэстибэни, улахан үлэни хааллара сылдьар саха саарына буолар», — диэн бэлиэтэ.
Үөрүүлээх тэрээһиҥҥэ «Таатта улууһа» муниципальнай оройуон баһылыга, Борис Федорович Неустроев-Мандар Уус 80 сааһыгар аналлаах үбүлүөйдээх тэрээһиннэри бэлэмнээһиҥҥэ уонна ыытыыга тэрийэр кэмитиэт бэрэссэдээтэлин солбуйааччыта Айаал Семенович Бурцев бэйэтин алгыс тылын, үбүлүөй чэрчитинэн улууска элбэх тэрээһин ыытыллыбытын туһунан эттэ. Маны таһынан, Дьокуускай куорат баһылыга Евгений Николаевич Григорьев Мандар Ууһу үөрүүлээх үбүлүөйүнэн эҕэрдэлээтэ, Баайаҕа сиригэр-уотугар, чуолаан Борис Федоровичка ыалдьыттаабытын, ол көрсүһүү кэнниттэн уларыйан кэлбитин туһунан кэпсээтэ.
Баайаҕа нэһилиэгин баһылыга Александр Романович Романов биир дойдулаахтарын, тус бэйэтин аатыттан эҕэрдэ тылларын эттэ, Баайаҕа нэһилиэгэр уонна Таатта улууһугар үбүлүөй чэрчитинэн үгүс элбэх тэрээһин ыытыллыбытын, таһаарыылаах үлэ барбытын, өссө да түмүктэнэ иликтэрин туһунан сырдатта. Ол курдук, Б.Ф. Неустроев-Мандар Уус 80 сыллаах үбүлүөйүн чэрчитинэн 2026 сыллаахха Баайаҕа нэһилиэгэр улахан «Уустар ыһыахтара» ыытыллаары туралларын туһунан сырдатта, ыалдьыттары ыҥырда. Александр Романович Кирилл Евгеньевич Бычковка уонна Афанасий Иванович Ноевка Махтал суруктары туттартаата.
Үөрүүлээх үбүлүөйдээх тэрээһин чэрчитинэн «Моҕол ураһа төрүт сатабылын кэрэһиттэрэ» өрөспүүбүлүкэтээҕи Мандар Уус утумнааччыларын кылаан үлэлэрин, «Мандар Уус олоҕо» быыстапкалар, норуот уус-уран оҥоһуктарын атыы дьаарбаҥката, «Куйаары улаҕатынан, сири сиксигинэн» Мандар Уус бөлүһүөктүү ойууларын быыстапката о.д.а араас хабааннаах тэрээһиннэр ыытылыннылар.
Айылҕа оҕото, ыраах айанньыт, кыраҕы харахтаах уус, ырааҕы анаарар бөлүһүөк, дьиктини айар ойууһут, сир түннүгэ сээркээн сэһэнньит, норуот туһугар үлэлээччи – сүдү, ытык киһибит – Мандар Уус, өссө да уһуннук олор, айымньылаахтык үлэлээ!
Сиһилии:
keskil14.ru