Бу күннэргэ Дьокуускайга «Боотур» доброволецтар этэрээттэрин бирииһигэр өрөспүүбүлүкэтээҕи «Боотур» ыччат спартакиадата биэс көрүҥҥэ ыытылынна. Ол курдук, барыта 20 хамаанда баскетболга, буулдьанан ытыыга, сахалыы остуол оонньууларыгар, байыаннай эстафетаҕа уонна канаат тардыһыытыгар икки тыҥааһыннаах күн күөн көрүстүлэр.
Хамаандалары сүүмэрдиир түһүмэх алтынньы 29 күнүттэн сэтинньи 27 күнүгэр диэри оройуоннарга, Дьокуускай куоракка ыытыллыбыта. Ол аата улуус чиэһин күүстээх, сымса нэһилиэк хамаандата көмүскээтэ. Холобур, Сунтаар улууһуттан Бордоҥ нэһилиэгин хамаандата кытынна. Хамаанда бэрэстэбиитэлэ Юлия Черепанова этэринэн, күрэххэ саамай биһирээбиттэрэ — оройуон сүүмэрдэммит хамаандатын буолбакка, нэһилиэк ыччатын күрэххэ кытыннарбыттара.
Ыччат миниистирэ Петр Шамаев спартакиада сыалын икки сорукка араарар: — Күрэхпит сыала-соруга, бастакытынан, тыа ыччатын хамсатааһын. Ол курдук, күрэхтэһиигэ үксүн нэһилиэк ыччата кыттыыны ылла. Көрүҥнэрбит даҕаны судургулар, хайа баҕарар нэһилиэккэ ыытыллар күрэхтэһиилэр. Иккиһинэн, бэтэрээннэри чиэстээһин, ыччакка убаастабылы иҥэрии, ыччаты дойдуга бэринилээх буоларга иитии.
Бары билэрбит курдук, Саха сириттэн «Боотур» доброволецтар этэрээттэрэ хомуллан, анал байыаннай операцияҕа тиийэн, бэриллибит соруктары көҥүл иһин туруулаһан толорон кэлбитэ. Спартакиада үөрүүлээх арыллыытыгар байыаннай дьайыы бэтэрээннэригэр Саха АССР 100 сыллаах үбүлүөйдээх анал знактара, Федор Кузьмич Попов аатынан «Патриот сүрэҕэ» бочуоттаах знага туттарылынна.
Икки күннээх тыҥааһыннаах киирсии түмүгүнэн, 1 миэстэни Дьокуускай куорат хамаандата ылла уонна «УАЗ» микроавтобус хаһаайыннарынан буоллулар. 2 миэстэни уонна 500 000 солк. суумалаах сертификатынан Бүлүү куорат хамаандата наҕараадаланна. 3 миэстэни уонна 300 000 солк. суумалаах сертификаты Мэҥэ-Хаҥалас оройуонун Тиэлиги нэһилиэгин хамаандата ылла.
Хоту улуустар ортолоругар маҥнайгы миэстэни Томпо оройуонун Кириэс-Халдьаайы нэһилиэгин хамаандата ылла уонна «Снегоход Буран-4ТД» бэртээхэй бирииһи тутта.
Спартакиада үөрүүлээх аһыллыытыттан түгэннэри видеоҕа көрүҥ:
Анна Слепцова, Петр Матвеев.
keskil14.ru