Сымса саҥалаахтарга, түргэн тыллаахтарга “Кэскил” оҕо бэчээтин кыһата куонкурус тэрийэр! 2019 сыл ахсынньы ыйыттан ыам ыйын 15 күнүгэр диэри өрөспүүбүлүкэ үөрэнээччилэригэр чабырҕах челленджин биллэрэбит! Бастакы үлэлэр номнуо кэллилэр.
“Чабырҕах челлендж” куонкуруска соҕотохтуу эбэтэр кэллэктиибинэн чабырҕахтаабыккытын видеоҕа устан ыытаргытын күүтэбит. «Хайдах кыттабын?» — диир буоллаххына, болҕойон аах:
- Сөбүлээбит чабырҕаххын өйтөн ааҕар гына үөрэт.
- Чуолкайдык чабырҕахтыыр гына чочуйан эрчилин.
- Чабырҕахтыы тураргын видеоҕа уһултар.
- Видеону keskil@inbox.ru электроннай аадырыска ыыт. Оҕо (эбэтэр ансаамбыл) аата, кылааһа, оскуолата, салайааччы-учуутал аата, билсэр төлөпүөн нүөмэрэ.
Чабырҕах – тас киэбинэн хоһооҥҥо маарынныыр, дохсун сүүрүктээх үрэх курдук, субуруччу түргэнник, лабыгыраччы этэн толоруллар. Сахалыы Бикипиэдьийэттэн.
Видеороликтарга ирдэбиллэр:
- Камераны салыбыраппакка үчүгэйдик тутуҥ;
- Устуу ракурсун уларыта сылдьыҥ;
- Наһаа ыраахтан устумаҥ;
- Чабырҕахсыттар саҥалара үчүгэйдик иһиллиэхтээх;
Ирдэбиллэргэ эппиэттэспэт роликтары ситэ көннөртөрө ыытыахпытын син.
Болҕойуҥ! Чабырҕах түргэнник этиллиэхтээҕин умнумаҥ, чабырҕах канонун тутуһуҥ!
Куонкуруска кэлбит үлэлэр Keskil14.ru cайтка, «Keskil Медиа» YouTube ханаалга, keskil.media Инстаграмҥа тахсыахтара.
Репертуар: «Этэҕэ-тэтэҕэ» диэн үөрэх кинигэтигэр баар чабырҕахтан ураты барыта көҥүллэнэр.
Видео уһуна : 10-15 мүнүүтэ.
Видеону keskil@inbox.ru электроннай аадырыска ыытаҕыт.
Болдьоҕо: 2020 сыл ыам ыйын 15 күнэ.
Түмүгэ: 2020 сыл бэс ыйын 1 күнүгэр (Оҕо көмүскэлин күнүгэр).
Бастыҥнар сыаналаах бириистэринэн наҕараадаланыахтара.