Бүгүн, бэс ыйын 7 күнүгэр, “Өрөгөй” спорт уораҕайыгар “Спортивные Якутяне» спартакиада чэрчитинэн ыытыллар бокс күрэҕэр финалга тахсар иһин киирсиилэр буоллулар.
Уопсайа 26 паара кытынна. Утарсыылар бэрт сытыытык уонна тыҥааһыннаахтык аастылар.
60 киилэҕэ киирсэр Кирилл Догордуров финалга таҕыста. Бэйэтин санаатын маннык үллэстэр:
—УОРга үөрэнэбин, бэйэм Үөһээ Бүлүүттэн төрүттээхпин. Боксанан дьарыктаммытым бэһис сылым буолла. Бүгүн финалга тахсар иһин киирсиигэ кыайан финалга таҕыстым. Кыайыыга эрэллээхпин. Былырыын буолбут спартакиадаҕа иккис буолбутум. Бүгүҥҥү хапсыһыыбар утарылаһааччыбын кытта киирсэ сылдьыбыт буолан долгуйбатым.
70 киилэҕэ Стас Протопопов утарылаһааччытын эрэллээхтик кыайан сарсын финалга киирсиэҕэ.
— Бүлүү Сыдыбылыттан сылдьабын. Боксанан дьарыктаммытым 5 аҥаар сыл буолла. Рингаҕа тахсаары туран наһаа долгуйбаппын. Ааспыт сылга күүстээх уолаттар элбэхтэр этэ, быйыл аҕыйахтар. Бастыам диэн эрэллээхпин.
Сарсын, бэс ыйын 8 күнүгэр «Спортивные Якутяне» спартакиада боксаҕа күрэҕин быһаарыылаах киирсиилэрэ «Триумф» спорт уораҕайыгар күнүс 12:00 чаастан буолуохтара. Кыттааччыларга ситиһиини, кыайыыны баҕарабыт.
Keskil14.ru