“Бизнес туһунан билэ улаатабыт, өй-санаа өттүнэн байабыт”

Оҕо дьиэ кэргэҥҥэ улаатар. Олоххо бастакы хардыыларын, сатабылларын, үөрүйэхтэрин дьиэ кэргэҥҥэ иҥэринэр. Кини ийэтэ, аҕата – кини көмүскэлэ.

Российскай Федерация атыы-эргиэн палататын иһинэн “Ситиһиилэх дьиэ кэргэн – ситиһиилээх Россия” диэн бизнес эйгэтигэр ыытар форум чэрчитинэн “Россия бизнеһин эрэллэрэ” диэн сүрдээх үчүгэй бырайыак үлэлиир.

Саха сириттэн Үөһээ Бүлүү оҕолоро, Д.С. Спиридонов аатынан 4 №-дээх орто оскуола үөрэнээччилэрэ, эдьиийдии-бырааттыы Санаайа, Сулустаан Антоновтар II миэстэни ыллылар.

Кинилэр төрөппүттэрэ Стелла уонна Александр Антоновтар чааһынай урбаанньыттар. Ааспыт сыл устата “Семейные компании России-2023» бырайыакка бэйэлэрин үлэлэрин көрдөрбүттэрэ, уопут атастаспыттара. Былырыын Москва куоракка Госдумаҕа Антоновтар дьиэ кэргэн династиятын хаартыската быыстапкаҕа турбута.

Ону салҕаан оҕолоро “Россия бизнеһин эрэллэрэ” бырайыакка кыттыыны ыллылар. Санаайалаах Сулустаан сыл устата дьиэ кэргэн бизнеһин туһунан видео клип, слайд, урбаанньыт, экономика боппуруостарыгар вебинардарга үөрэнэн элбэҕи биллилэр.

Бырааппынаан бу бырайыакка кыттан элбэххэ үөрэннибит. Үөһээ Бүлүүгэ олохсуйбут Баай Батаакап историятын туһунан кэпсээммит дьүүллүүр сүбэ сэҥээриитин ылбыппыт. Бизнес хайдах барыахтааҕын, клиеннары кытта үлэлээһин курдук хайысхаларга эппиэттэри булан үөрэннибит. Үлэбит түмүктэриттэн астынныбыт. Маннык бырайыактарга кыттан киһи сайдар эбит, – диэн санаатын үллэстэр VII кылаас үөрэнээччитэ Санаайа Антонова.

2024 сыл Россияҕа Дьиэ кэргэн сыла. Онон бизнес эйгэтигэр үлэлии сылдьар дьиэ кэргэҥҥэ анаан ыытыллар форум түмүктүүр чааһа үрдүк таһымҥа ыытыллыбыт.  Ыам ыйын 28 күнүгэр Урбаанньыттар күннэригэр Москва куоракка конгресс-кииҥҥэ буолан ааспыт.

Антоновтар дьиэ кэргэн форуму быһа эфирынан тахсан көрбүттэр. Форум кыттыылаахтарын Россия торговай-промышленнай палаата Президенэ Сергей Катырин, Россия Государственнай Федеральнай Мунньаҕын бэрэссэдээтэлин солбуйааччыта Анна Кузнецова, Россия социальнай харалта министиэристибэтин I солбуйааччыта Ольга Баталина, Россия торговай-промышленнай палататын вице-президенэ Елена Дыбова, Дьиэ кэргэни көмүскүүр кэмитиэт бэрэссэдээтэлин I солбуйааччыта Татьяна Буцкая уо.д.а. эҕэрдэлээбиттэр.

Салгыы бырайыак кыттыылаахтарыгар финансовый ребус таайыы күрэҕэ ыытыллыбыт. Онно биһиги оҕолорбутун хайҕаабыттар.

Бу улахан таһымнаах бырайыак түмүгүнэн, 33 регионтан эдьиийдии-бырааттыы Санаайа, Сулустаан Антоновтар II миэстэ буоллулар.

Антоновтар дьиэ кэргэн маннык киэҥ хабааннаах форумҥа кытталларыгар күүс-көмө, сүбэ-ама буолбут Саха сиринээҕи торговай-промышленнай палата Президенигэр Марина Богословскаяҕа, куратордарыгар Зоя Даниловна Рееваҕа улахан махталларын тиэрдэллэр.

Санаайалаах Сулустаан оҕо саадыттан саҕалаан сахалыы тыллаах “Чуораанчык” сурунаалы, “Кэскил” хаһыаты сөбүлээн ааҕаллар. Онуоха сөптөөх эйгэни ийэлээх аҕата туох баар кыахтарын, сатабылларын ууран тэрийэллэр.

Өрөспүүбүлүкэ үрдүнэн оҕолорго аналлаах соҕотох сахалыы тыллаах оҕо сурунаалын, хаһыатын биһиги дьиэ кэргэн өрүү үрдүктүк тутабыт. Оҕолорбутугар кыра эрдэхтэриттэн суруйтарабыт. Сурунаалга тахсар туһалааҕы булан аахтыннар, көрдүннэр, төһөнү баҕарар кырыйдыннар, айдыннар диэн хааччахтаабаппыт. Сахалыы сурунаал, хаһыат дьиэбитигэр кэллэҕинэ, биһиэхэ нууччалыы эттэххэ, “творчество киэһэлэрэ” саҕаланаллар. Ол оҕоҕо олус туһалаах, – диэн ыал ийэтэ Стелла Антонова санаатын үллэстэр.

Санаайалаах Сулустаан иккиэн оҕо искусствотын оскуолатыгар художественнай кылааска үөрэнэллэр. Санаайа былырыын фольклор кылааһын бүтэрбит. Технопааркаҕа дьарыктанар.

Сулустаан II кылааһы бүтэрдэ. Кыылы-сүөлү ордук таптыыр. Черепаханы, улитканы сөбүлээн иитэр. Тулалыыр эйгэҕэ харыстабыллаахтык сыһыаннаһар.

Оҕолор иккиэн дьиэ кэргэн бизнеһигэр туһа дьоно, куруук көмөлөһөллөр. Санаайа сайын, кыһын, саас каникулун кэмигэр дьонугар көмөлөһөн, дьиэ кэргэнин туһугар тус эппиэтинэһи сүгэн үлэлиир.

Бизнес эйгэтигэр ситиһиилээхтик үлэлии сылдьар Антоновтар дьиэ кэргэн оҕолорун өй-санаа, ис кэрэ өттүнэн ураты болҕомтолоун ууран иитэллэрин киһи хайгыыр, сэргиир.

Санаайалаах Сулустаан дьиэ кэргэн сылаас эйгэтигэр бигэнэн, өй-санаа өттүнэн байан, киһи киһитэ буолан тахсалларыгар ис сүрэхпиттэн баҕарабын.

Сардаана МАТВЕЕВА