Үөһээ Бүлүүгэ «Үс хоһуун» спортивнай комплекска оскуола үөрэнээччилэригэр греко-римскэй тустууга ыстаарсай тириэнэр, көҥүл тустууга норуоттар икки ардыларынааҕы кылаастаах маастар Матвей Матвеев, оҕунан ытыыга Саха Өрөспүүбүлүкэтин кыргыттарга тириэнэрэ, СССР успуордун маастара Надежда Спиридонова маастар-кылаас ыыттылар. Нуучча дуобатыгар норуоттар икки ардыларынааҕы, Россия гроссмейстэрэ, нуучча дуобатыгар 12 төгүллээх аан дойду чөмпүйүөнэ, Саха Өрөспүүбүлүкэтин физическэй култуураҕа үтүөлээх үлэһитэ, Саха Өрөспүүбүлүкэтин кылаабынай тириэнэрэ Гаврил Колесов оҕолорго дуобакка сийээнис биэрдэ.
Ороһу оскуолатын физкультура учуутала, ахсыс кылаас салайааччыта Дмитрий Константинов кылааһын уолаттарын Валерий Ласточкины, Егор Крылатовы, Спиридон Ивановы, Айыстаан Селясиновы илдьэн маастар-кылааска, дуобат сийээһинигэр сырытыннарда.
Ону таһынан уопсай күүс бэлэмигэр, миэстэттэн туран эрэ ыстаныыга, скакалкаҕа, челночнай сүүрүүгэ нуорматыып туттардылар.
Успуорка улахан ааттаах-суоллаах, ситиһиилээх, успуорду көҕүлээччи дьону кытта алтыһыы, кинилэр сүбэлэрин истии оҕолорго биир бэлиэ, ураты түгэнинэн буолан ааста.
«Тымтык» эдкорпост, Ороһу, Үөһээ Бүлүү.