Муус устар 14-18 күннэригэр дойдубут тэбэр сүрэҕэр Москва куоракка Арассыыйа биллиилээх учуонайа, уопсастыбаннай диэйэтэл Владимир Иванович Вернадскай аатынан үөрэнээччилэргэ аналлаах XXXII Бүтүн Арассыыйатааҕы ааҕыылар ыытылыннылар. Куонкуруска сыллата 8-10 кылаас оҕолоро кытталлар.
Быйылгы ааҕыыларга Үөһээ Бүлүү улууһун Дүллүкү орто оскуолатын 8 кылааһын үөрэнээччитэ Айхал Петров «Куйуур — древнейший и уникальный вид подледной рыбалки в с. Дюллюкю» диэн үлэтинэн кыттыыны ылла.
Бастакы күҥҥэ оҕолор Арассыыйатааҕы Наукалар академиялар президиумун киэҥ саалатыгар секцияларынан стендэлэрин көмүскээбиттэр. Иккис, үһүс күн В. И. Вернадскай аатынан 1553 №-дээх оскуолаҕа дакылааты ааҕыы, семинардар, куонкурустар ыытыллыбыттар. 4-с күн «Тропой открытий В.И. Вернадского» 5-7 кылаас оҕолоругар хамаанданан оонньуу-куонкурус буолбут. 5-с күн А.П. Гайдар аатынан Оҕо уонна ыччат дыбарыаһыгар бу улахан куонкурус кыттыылаахтарын наҕараадалааһына ыытылынна.
Айхал үлэтэ I степеннээх дипломунан бэлиэтэннэ уонна бэйэтин куйуурдуур сатабылын көрдөрбүт видеота, аҕатын, учууталын кытта оҥорбут оҥоһуга «Бастыҥ инсталляция» диэн номинацияны ылла.
Кини куйуур саха омук мындыр өйүнэн айыллыбыт, аас-туор сылларга саханы хоргуйууттан быыһаабыт, билигин да туттуллар муус аннынан балыктааһын биир ураты көрүҥэ буоларын сиһилии арыйда. Куйуурга туттуллар араас ньымалары, куйуур тэриллэрин үөрэтэн, тылдьыт оҥорон, анкета ыытан үлэлээтэ. Маны таһынан балыктан оҥоһуллар ас-үөл туһунан, собо эмкэ туттуллуутун үөрэттэ, уопуттаах балыксыттартан сүбэ-ама ылла. Онон Айхал, өбүгэбит биир үтүө үгэһин киэҥ эйгэҕэ билиһиннэрэн, сэҥээриини ылла. Салайааччылара Антонина Ивановна Афанасьева, саха тылын, литературатын учуутала уонна Үүйэ Семенова Петрова, нуучча тылын, литературатын учуутала.
Билим эйгэтигэр дьоһуннаах ситиһиитинэн, дойдубут киин куоратыгар өбүгэбит биир үтүө үгэһин билиһиннэрэн биһирэммитинэн Айхалы истиҥник эҕэрдэлиибит!
Айыына ПЕТРОВА,
VIII кылаас,
«Эрчим» медиакиин, Дүллүкү орто оскуолата, Үөһээ Бүлүү