Хаҥалас улууһун М.Е.Васильева аатынан 2-с Малдьаҕар орто оскуолатын “Эрэл” оҕо түмсүүтэ быйыл Хаҥалас улууһун баһылыгын гранын сүүйбүппүт. Ол курдук 30 тыһыынча солкуобайга “Выпуск книги об учителе” бырайыакпыт кыайан, быйыл учуутал күнүгэр кинигэбит күн сирин көрдө. Бу маннык куонкурус биһиги улууспутугар сылын аайы ыытыллар. Быйыл уонтан тахса оҕо түмсүүтэ кыттан, онтон үс бастыҥ бырайыак талыллыбыта.
Биһиги 2020 сылтан саҕалаан, оскуолабыт аатын сүгэр Матрена Егоровна Васильева туһунан кинигэҕэ үлэлэһэн саҕалаабыппыт.
Пандемия буолан, ахтыы биэриэн баҕалаах дьон биһиэхэ илиилэринэн суруйбуттарын оскуолаҕа аҕалан хаалларар этилэр. Биһиги үөрэнээччилэр ол ахтыылары компьютерга бэчээттээн, кинигэбит матырыйаала элбээн испитэ. Ити курдук 31 киһи ахтыыта биһиги кинигэбитигэр киирдэ. 10 киһи видео ахтыытын оскуолабыт ютуб ханаалыгар уктубут. Кинигэбит электроннай варианын дьоҥҥо тарҕаттыбыт. Матрена Егоровна туһунан видеоролигы оҥорон ютубка таһаардыбыт.
Биһиги кинигэбит тахсарыгар 5 учуутал, 16 үөрэнээччи кыттыыны ыллылар. Барыта 70 экземпляр кинигэттэн 45 кинигэни атыылаан, Матрена Егоровна туһунан баннер оҥоттороору сылдьабыт. 25 кинигэни бэлэхтээтибит.
Ити курдук оҕолор бу бырайыакка кыттан, кинигэни хайдах оҥорорго, компьютерга бэчээттииргэ, видео устарга, монтажтыырга, граны көмүскүүргэ, хамаанданан үлэлииргэ үөрэннилэр.
Саша ЛЬВОВА,
М.Е. Васильева аатынан 2-с Малдьаҕар
орто оскуолатын 11 кылааһын үөрэнээччитэ.