Билигин төрөппүттэр оҕолорун дьиэттэн олорон «Эбии үөрэхтээһин навигатора» диэн саҥа арыллыбыт Интернет ситимин нөҥүө араас куруһуоктарга, секцияларга суруттарыахтарын сөп буолла. Бу портал «Үөрэхтээһин» национальнай бырайыактар чэрчилэринэн «Хас биирдии оҕо ситиһиитэ» диэн федеральнай бырайыак иһинэн тэрилиннэ. Бу туһунан оҕо эбии үөрэхтээһинигэр тус сыаллаах халыыбы киллэриигэ Федеральной экспертнэй бөлөх салайааччыта Александр Костин иһитиннэрдэ.
«Эбии үөрэхтээһин навигатора» — бу оҕо бары өттүнэн сайдарыгар туһуламмыт араас хайысхалаах эбии үөрэхтээһин кииннэрин биир сиргэ муспут куйаар ситимин улахан былаһаакката буолар.
Тэрийээччилэр этэллэринэн, бу портал төрөппүт бириэмэтин харыстыырыгар улахан көмөлөөх уонна идэлээх дьон оҥорбут методическэй тестэрин нөҥүө оҕоҥ ханнык эйгэҕэ сайдар кыахтааҕын билэн баран, ол хайысхаҕа тута миэстэтигэр кэтэхтэн суруттарыаххын сөптөөх буолла.
Балаҕан уонна алтынньы ыйдарга бу былаһааккаҕа оҕолорго аналлаах эбии араас күрэстэр, бырайыактар, форумнар, хакатоннар, кэнпириэнсийэлэр ыытыллан саҕаланыахтарын тэрийээччилэр бэлиэтээн аастылар.
Төрөппүттэр оҕолоргутун куруһуоктарга, спортивнай хайысхалаах секцияларга суруттарыаххытын баҕарар буоллаххытына, күн бүгүн «Эбии үөрэхтээһин навигатора» диэн саҥа арыллыбыт Интернет ситимигэр киирэн, оҕоҥ сөбүлүүр эбии дьарыгын булуоххун сөп буолла. Ссылката:
«Навигатор дополнительного образования Республики Саха (Якутия)».
Бу туһунан үөрэх үлэһиттэрин Атырдьах ыйынааҕы пленарнай мунньаҕар төрөппүттэри кытары көрсүһүүгэ иһитиннэрдилэр.
Тускутугар туһаныҥ, ситиһиилээх үөрэх дьыла саҕаланнын!
Анна СЛЕПЦОВА.