Биһиэхэ кылааспытыгар олус истиҥ көрсүһүү буолан ааста. Оскуолабыт музейын үлэһитэ А.Е. Васильева уонна ветеран учуутал А.И. Леонтьева оскуола музейыгар баар рюкзак туһунан кэпсээтилэр.
Бу рюкзагы Саха Өрөспүүбүлүкэтин Бастакы Президенэ Михаил Ефимович Николаев 1994 сыллаахха оскуолаҕа киирбит оҕолорго үчүгэйдик үөрэнэллэригэр анаан бэлэхтээбит.
Онон 30 сыл аннараа өттүгэр Саха сирин оскуолаларыгар маҥнайгы кылааска киирбит оҕолор бары Михаил Ефимович бэлэҕин – бу рюкзагы сүгэн билии-көрүү аартыгар үктэммиттэр.
“Эн үчүгэйдик үөрэнэн, чэгиэн-чэбдик сылдьан, туһа киһитэ буола улаат”, – диэн Бастакы Президеммит кэс тылын иһиттибит.
Оччолорго 7 саастаах, билигин Нам улууһун “Эҥсиэли” хаһыатыгар үлэлиир С.М. Аргунов Михаил Ефимович бэлэҕин харыстаан, уура сылдьан баран, 30 сыл кэнниттэн оскуола музейыгар туттарбыт.
Кылаас оҕолоро бары Бастакы президеммит М.Е. Николаев 30 сыллааҕыта туттарбыт бэлэҕин – рюкзагын кэтэн, тутан-хабан көрдүбүт, олус сэргээтибит.
Эрсан ПАВЛОВ, II «А» кылаас,
И.Е. Винокуров аатынан Хатыҥ Арыы орто оскуолата, Нам