Оскуолабыт киэн туттар спортсмена, Х кылаас үөрэнээччитэ Айтал Григорьев чэпчэки атлетикаҕа Дьокуускай куорат бастыыр иһин күрэхтэһиитигэр икки төгүл чемпион үрдүк аатын ылла. Күрэхтэһии ахсынньы 8-9 күннэригэр Дьокуускайга «Триумф» спортивнай комплекска буолан ааста. Бу улахан түһүлгэ биһиги Айталбытыгар улахан соргулаах буолла.
Бастакы күн Айтал 1500 миэтэрэ дистанцияҕа барыларыттан чорбойон, дьулуурдаахтык сүүрэн бастакы миэстэни ылла. Бу кини утумнаах уонна күүстээх дьарыгын, бөҕө санаатын түмүгэ буолар.
Күрэхтэһии иккис күнүгэр 3000 миэтэрэ дистанцияҕа барыбыт үөрүүтүгэр эмиэ бастакы миэстэни ылан, уһун тыыннаах, кыахтаах чемпион сүүрүк буоларын бигэргэттэ.
Биир күрэхтэһиигэ икки дистанцияҕа бастакы миэстэлэри ылар – Айтал сыралаах үлэтин, дьарыгын түмүгэ буолар уонна эт-хаан өттүнэн ситэн-хотон , буһан-хатан иһэрин туоһулуур.
Спортсмен уол ситиһиитигэр Айтал этин-сиинин, өйүн-санаатын табатык тутан дьарыктыыр, бэлэмниир тириэньэрэ Реворий Михайлович Елисеев сүҥкэн улахан кылааттаах.
Айтал Григорьев дэгиттэр кыахтааҕынан, ыарахаттартан толлон турбатынан, спортсмен быһыытынан бэйэтигэр күүстээх ирдэбилинэн биһиэхэ холобур буолар. Кини хаһан да бэриммэт, өрүү инники сылдьарга, үрдүк чыпчааллары дабайарга дьулуһарын киэн тутта, астына көрөбүт.
Айталга өссө үрдүк ситиһиилэри, кытаанах доруобуйаны, бөҕө санааны баҕарабыт! Кини Саха сирин аатын өссө ааттатыаҕа диэн эрэнэбит. Бу улахан кыайыытынан оскуолабыт аатыттан барыбыт эҕэрдэбитин тиэрдэбин.
Виталий ОРЛОВ, IX кылаас,
С.Д. Флегонтов аатынан Хадаар орто оскуолата, Чурапчы