Тыа сиригэр олорор саха дьоно сылгы, сүөһү иитэр буоллахтарына, кыралыын-улаханныын куйаас сайыҥҥа хайаан даҕаны оттууллар.
Мин 4-с кылаастан сайын аайы от үлэтигэр сылдьабын, эбэлээх эһэбэр көмөлөһөбүн. Быйыл эмиэ от харбаатым, мустум, бугул оҥорон көрдүм. Кээһиигэ бугул оннун харбаатым.
Биһиги өлгөм үүнүүлээх Иэһэрдээх уонна Билиилээх алааска оттуубут. 5-с кылааһы тахсыбыт быраатым Андрей эмиэ миигин кытта тэҥҥэ үлэлэһэр. Оппутун ардахха баттаппакка кээһэ сатыыбыт.
Эһэм тракторынан охсо сылдьан от быыһыгар кус уйатын көрбүт, онно 7 сымыыт баар эбит, онтон 6 буолбут этэ.
Биһиги биир сымыыттан кус оҕото тахсыбытын көрбүппүт, кып-кырачаан этэ. «Кус оҕотун илиигинэн тыытыа суохтааххын, таарыйдаххына илииҥ сыта хаалан хаалар, оччоҕо ийэтэ кусчаанын мээнэ быраҕан кэбиһэр»,- диэн эбэм сэрэппитэ.
Ийэ кус улахан этэ, биһигиттэн соһуйан көтө турбута.
Бу курдук, сайын дьиэ кэргэнинэн үөрэ-көтө үлэлиэххэ уонна айылҕа араас кистэлэҥин билиэххэ- көрүөххэ сөп.
Ньургун Романов, VI кылаас, «Эрчим» медиакиин, Дүллүкү, Үөһээ Бүлүү