Бары билэрбит курдук «Азия оҕолоро» норуоттар икки ардыларынааҕы оонньуулара Саха өрөспүүбүлүкэтин бастакы Президенэ М.Е. Николаев көҕүлээһининэн 1996 сылтан ыытыллар. Биһиги оскуолабыт эдэр спортсменнара 2004 сыллаах үһүс оонньууларга кыттыыны ылбыттара.
Ол курдук, ол сыллааҕы оонньууларга мас тардыһыытыгар икки уол Руслан Пахомов уонна Дима Устинов бастаан Сахабыт сиригэр элбэх турнирдарга кыайан, өрөспүүбүлүкэ бастакы хамаандатын састаабыгар киллэриллэн, ситиһиилээхтик кыттан, иккиэн бэйэлэрин ыйааһыннарыгар бастаан кыһыл көмүс мэтээли түөстэригэр иилиммиттэрэ. Маннык мэтээли кинилэри эрчийбит, дьарыктаабыт оччолорго спортзал дириэктэрэ Георгий Дмитриевич Устинов ылбыта. Бу улахан ситиһии, үөрүү-көтүү этэ.
Онтон оскуолаҕа Дьокуускайдааҕы педучилищены бүтэрэн, мас тардыһыытыгар спорт маастара Дмитрий Дмитриевич Устинов физкультура учууталынан үлэлии кэлбитэ. Кини оҕолорго секция аһан, уолаттары ситиһиилээхтик эрчийэн барбыта. Оскуола оҕолоро элбэх күрэхтэһиигэ кыттан, элбэх кыайыылары ситиспиттэрэ. Ол түмүгэр икки чулуу уола Ваня Федоров уонна Слава Оконешников IV Оонньууларга 2008 сылга өрөспүүбүлүкэ бастакы хамаандатын састаабыгар киирбиттэрэ. Ол күрэхтэһиигэ Ваня Федоров II миэстэ буолан, оонньуу үрүҥ көмүс мэтээлин түөһүгэр иилиммитэ. Онтон Слава Оконешников боруонса мэтээли ылбыта. Бу икки уол Арассыыйаҕа Калуга куоракка ыытыллыбыт бастакы чемпионат призердара буолары ситиспиттэрэ.
Онтон 2012 сыллаах оонньууга элбэх сүүмэрдиир түһүмэх түмүгүнэн өрөспүүбүлүкэ бастакы хамаандатыгар Стас Кириллин, иккис хамаандатыгар Макаров Айастаан киирэри ситиспиттэрэ. Бэйэлэрин ыйааһыннарыгар Стас кыһыл көмүс, онтон Айастаан үрүҥ көмүс мэтээли түөстэригэр иилиммиттэрэ.
Биһиги, билиҥҥи ыччат биир дойдулаахтарбыт Азия оҕолорун оонньуутугар ситиһиилээхтик кыттыбыттарынан, дойдуларын чиэһин көмүскээбиттэринэн киэн туттабыт.
Лилия Гермогенова, IX кылаас, А.А. Пахомов аатынан Тиэлиги орто оскуолата