Кустуур орто оскуолатыгар Геройга анаммыт үөрэнэр паарта баар. Бу паарта биһиги биир дойдулаахпыт, эдэр сааһыгар анал байыаннай дьайыы хонуутугар геройдуу охтубут Иван Семенович Горохов сырдык кэриэһигэр ананан туруоруллубута.
Иван Семенович Горохов Эбээн-Бытантай улууһугар Кустуур нэһилиэгэр 1991 сыллаахха балаҕан ыйын 8 күнүгэр күн сирин көрбүтэ. Дьоллоох оҕо сааһа Кустуурга ааспыта. Оҕо оҕо курдук мэниктээн-оонньоон, үөрэн-көтөн улааппыта.
1998 с. Кустуур орто оскуолатыгар үөрэнэ киирэр. Оскуола сылларыгар Ваня теннис, тустуу, хапсаҕай курдук спорт көрүҥнэригэр дьаныардаахтык дьарыктанара. Зональнай, улуустааҕы күрэхтэргэ бириистээх миэстэлэри ылара.
Ону тэҥэ эбии үөрэхтээһин ырыа, үҥкүү куруһуогар сылдьыбыта. «Дьиэрэй» уолаттар ырыа ансаамбылыгар солистаабыта, «Өрэлдэк» үҥкүү бөлөҕөр сылдьара. Араас улуустааҕы, өрөспүүбүлүкэтээҕи курэхтэргэ, фестивалларга ситиһиилээхтик кытталлара. Бары өттүнэн эргиччи талааннааҕа киһини сөхтөрөр, биһиги оскуола үөрэннээччилэрэ киэн туттабыт.
Оскуола кэнниттэн 2009 сыллаахха айар талаанын сайыннараары Дьокуускайдааҕы култуура колледжыгар үөрэнэ киирэр. Устудьуоннуур кэмнэригэр араас таһымнаах күрэхтэргэ, тэрээһиннэргэ кыттан, тэҥҥэ тэрийсэн, дьоҕурун киэҥ эйгэҕэ көрдөрбүтэ, холобур буолар бастыҥ устудьуоннар ааттарыгар сылдьыбыта.
2010-2011 сылларга ытык иэһин толоро армия кэккэтигэр танковай войскаҕа сулууспалыыр. 2014 сылтан үөрэҕин ситиһиилээхтик түмүктээн, Амма нэһилиэгэр култуура дьиэтигэр специалиһынан үлэлиир.
2015 с. төрөөбүт сиригэр төннөн кэлэн «Гарпан» ЭКК уус-уран салайааччытынан, Оҕо саас киинигэр эбии үөрэхтээһин уһуйааччытынан үлэтин салгыыр.
2016 с. олоҕун аҥарын көрсөн Лидия Андреевналыын ыал буолан Гороховтар эдэр дьиэ кэргэн аатын ылаллар. 2016 с. бастакы уол оҕолонон ийэ, аҕа үрдүк аатын сүгэллэр, 2021 с. иккис уолларын оҕолонон толору дьоллоноллор.
Ваня дьиэ кэргэн тапталлаах аҕата, нэһилиэк культурнай уонна общественнай тэрээһиннэриттэн хаһан да туора турбат биир чаҕылхай ыччаппыт буоларын бары да билинэбит. Маны таһынан өрөспүүбүлүкэтээҕи, зональнай, улуустааҕы ырыа күрэхтэригэр иннин кимиэхэ да биэрбэтэх кыайыылаах ырыаһыт, солбуллубат тамада буолара.
2016-2022 сс. «Хаарчаана» оҕо саадыгар музыкальнай салайааччынан олус айымньылаахтык үлэлиир. Кырачааннары музыка, ырыа кэрэ эйгэтигэр иитии-үөрэтии дьарыгын баһылаан өрөспүүбүлүкэтээҕи күрэххэ ситиһиилээхтик кыттыыта туоһулуур.
2022 сыл кулун тутар ыйыттан «Гарпан» ЭКК директорынан ананан култуура эйгэтигэр салайар үлэтин саҕалыыр.
Ванябыт 2022 сыл алтынньы ыйыгар дойду үрдүнэн ыытылла турар политическай, байыаннай дьаһаллар чэрчилэринэн мобилизацияҕа түбэһэн дойдубут, дьоммут, норуоппут, дьиэ кэргэммит туһугар диэн патриотическай санаанан анал байыаннай дьайыыга барбыта.
От ыйын 7 күнүгэр анал байыаннай дьайыы киирсиитигэр чугас табаарыһынаан, Стручков Егор Ивановичтыын, ыарахан эчэйииттэн геройдуу сырдык тыыннара быстыбыта.
Олус хомолтолоох сураҕы нэһилиэк дьоно-сэргэтэ уонна дьиэ кэргэнэ истэннэр улаханнык хомойбуттара, курутуйбуттара. Нэһилиэнньэ кини дьиэ кэргэнигэр улахан болҕомтону уураннар, туох баарынан көмөлөспүттэрэ. Кини аатын билигин Кустуур сэлиэнньэтигэр үөрэммит оскуолатыгар Юнармия хайысхата сүгэр. Биһиги оскуола үөрэнээччилэрэ мин нэһилиэнньэм Геройа диэн Иван Семеновиһы убаастыы, киэн тутта ааттыыбыт.
Кини, кырдьык, Герой! Биир дойдулаахпыт Горохов Иван Семенович аатын хаһан да умнуо суохпут! Герой мэлдьи тыыннаах биһиги сүрэхпитигэр, өйбүтүгэр-санаабытыгар!
Стас Попов, Кустуур орто оскуолатын 8 кылааһын үөрэнээччитэ, «Биракчаан» медиа-киин эдкора.
keskil14.ru