2026 сыл Ньурба оройуонугар Спорт сылынан биллэрилиннэ. Ол чэрчитинэн ыытыллыбыт «Спортивная Нюрба» диэн форумҥа улахан спортка бэйэтин кылаатын киллэрбит, киэн туттар биир дойдулаахпыт Российскай Федерация үтүөлээх тренерэ, Саха Өрөспүүбүлүкэтин физическай култууратын уонна спордун үтүөлээх үлэһитэ, Саха Өрөспүүбүлүкэтин адаптивнай спордун старшай тренерэ, ПОДА (уҥуох-былчыҥ тиһигэр кэһиллиилээх эбэтэр оҥоһуу салҕааһыннаах дьон) уонна хараҕа суохтарга пауэрлифтинг көрүҥҥэ Арассыыйа сүүмэрдэммит хамаандатын тренердиир састаабыгар киирэр, сахалыы многоборье спордун маастара Пётр Николаевич Давыдов кэлэн үлэлэстэ.
Ол таарыйа төрөөбүт дойдутугар Чуукаарга кэлэн дьонун-сэргэтин кытары көрүстэ. Ол курдук Петр Николаевич нэһилиэнньэ аҕам саастаах дьоно мустан сарсыардааҥҥы эти-хааны чэбдигирдэр дьарыктарыгар кыттыста. Нэһилиэк спортивнай позициятын өрө тута сылдьарын көрөн астыммытын, дуоһуйбутун биллэрдэ.
Салгыы оскуола иһинэн үлэлиир «Саҥа ситим» медиакиинигэр интервью биэрдэ. Манна кини тренер үлэтин уустуктарын, уратытын туһунан кэпсээтэ, спортка бастакы хардыыларын оҥорор дьоҥҥо сүбэ-ама биэрдэ уонна биир дойдулаахтарыгар баҕа санаатын эттэ. Ол кэннэ оскуола оҕолорун кытары көрсөн бэйэтин холобурунан олох харгыстарын туораан хайдах бэйэ сыалын ситиһэр, сөптөөх суолунан бигэтик айанныыр туһунан умсугутуулаах кэпсэтии ыытта, үөрэнээччилэр кэрэхсэбиллэрин тутта. Түмүгэр нэһилиэк олохтоохторун кытта аһаҕастык кэпсэттэ, оҕо сылдьыбыт кэмнэрин ахтан-санаан ааста, хайдах үлэлии-хамсыы сылдьарын туһунан бар дьонугар сырдатта. Кини маннык үрдүк ситиһиилэрдээх дьоһун киһи буолбутугар дойдун дьоно суҥкэн оруолу оонньообуттарын биллэрдэ уонна махтал тыллары анаата.
Онон биһиги ытыктыыр киһибит, Саха сирин успуорда сайдыытын туһугар элбэх сыратын ууран үлэлиир Петр Давыдовпыт төрөөбүт Чуукаарын сайаҕас салгынынан сайа тыынан, оҕо сылдьан оонньообут алааһынан, сүүрбүт-көппүт уулуссаларынан сылдьан, дьонун-сэргэтин кытары истиҥник кэпсэтэн күүһүгэр күүс, сэниэтигэр сэниэ эбинэн барбыта буолуо диэн эрэнэбит, үлэтигэр өссө үрдүк ситиһиилэри баҕарабыт.
Сиһилии видеоҕа көрүҥ:
Дария Данилова, Чуукаар орто оскуолатын 11 кылааһын үөрэнээччитэ.
keskil14.ru