Биһиги нэһилиэкпититтэн 1996 сыллаахха «Азия оҕолоро» Норуоттар икки ардыларынааҕы бастакы спортивнай ооньууларга Василий Ильин ситиһиилээхтик кыттан турардаах. Билигин Василий Николаевич Хаҥаластааҕы оҕолору эбии үөрэхтээһин киинин дириэктэрэ.
1996 сыллаахха Василий Саха сирин хамаандатын хамандыыра буолан, Саха сирин былааҕын көтөҕөр үрдүк чиэскэ тиксибитэ. Кини сүүрүү көрүҥэр кыттыбыт. 5000 м I миэстэ, 1500 м II миэстэ буолбут.
Василий Николаевич чэпчэки атлетикаҕа улуус, өрөспүүбүлүкэ чиэһин элбэхтик көмүскээбитэ. Учуутал, иитээччи быһыытынан эмиэ үрдүк ситиһиилэрдээх. Ол курдук улуус, өрөспүүбүлүкэ, Уһук Илин федеральнай уокурук таһымыгар «Сыл бастыҥ учуутала» ааты ылбыта.
Василий Ильин спорт эйгэтигэр Уһук Илин федеральнай уокурук, Арассыыйа, Норуоттар икки ардыларынааҕы таһымнаах ситиһиилэрин мэктиэлэрэ — хаартыскалара, мэтээллэрэ, кубоктара — Чурапчытааҕы спорт институтугар дьон көрүүтүгэр-истиитигэр тураллар.
Василий Николаевич Саха Өрөспүүбүлүкэтин Спордун уонна Үөрэҕириитин туйгуна.
Биир дойдулаахпынан киэн туттабын.
Амелия Алексеева, VII класс,
«Үрдэл. Медиа» медиакиин кэрэспэдьиэнэ,
А.Д. Широких аатынан Төхтүр орто оскуолата, Хаҥалас улууһа