Дьоруой оҕолор диэн кимнээхтэрий? Урут Аҕа дойду сэриитин саҕана дьоруой оҕолор баар буолалларын историяттан ааҕан билэрбит. Онтон билиҥҥи үйэ дьоруойа биһиэхэ да бааллар эбит диэн сүрдээҕин астына, хайгыы иһиттим. Бүгүҥҥү кэпсиир дьоруой уолум биир дойдулааҕым, 11 кылаас үөрэнээччитэ Вася Другин.
Кини былырыын бу түбэлтэ буоларыгар 10 кылаас этэ. Ол түбэлтэни кэпсиир буоллахха, кылгастык бу курдук. Эбээн Бытантай Кустуур нэһилиэгэр сайын 3 саастаах Күндүмэн оонньуу сылдьан ойуурга сүтэр. Күүстээх санаалаах уол сүтүө диэн, бөһүөлэкпит аймана, биир сомоҕо буолан көрдөөбүтүнэн бараллар. Ол иһигэр Вася Другин оттуу сылдьан, бөһүөлэктэн тэйиччи сиргэ көрдүүргэ быһаарыналлар. Оҕону иккис күнүгэр булан, барыта этэҥҥэ ааһар.
Вася Другин 2023 сыллаахха Д.Н. Лепчиков илии баттааһыннаах махтал сурук уонна мэтээл тутар, ону оскуолабытыгар чиэстээн туттараллар. Ити сыл тохсунньу ыйга Дьокуускай куоракка дьоруой оҕолору чиэстээһин күнүгэр ыҥыраллар. Онно кини «За проявленное мужество» өйдөбүнньүк мэтээлинэн наҕараадаланар.
Биир мэтээл историятын астына, биир дойдулааҕым туһунан киэн тутта кэпсээммин түмүктүүбүн.
Сарыал Колесов, «Биракчаан.ru» медиакиин кэрэспэдьиэнэ,
Кустуур орто оскуолата, Эбээн Бытантай улууһа.