Ахсынньы 5 күнүгэр биhиэхэ С.П. Данилов аатынан Бэрдьигэстээх орто оскуолатыгар олус кэрэхсэбиллээх уонна долгутуулаах «Дьоруой муннуга» арыллыыта буолла. Бу муннук дойдуларын көмүскээбит, хорсун быhыыны уонна үтүө мөссүөнү көрдөрбүт биhиги выпускниктарбытыгар ананар.
Тэрээhин үөрэнээччилэр саллаат ырыатын тыаhыгар кэккэлэhиилэриттэн саҕаланна. Ыытааччылар Руслан Рустамович Семенов уонна Виктория Петровна Колодезникова «Дьоруой муннуга» — бу Арассыыйа үрдүнэн ыытыллар бырайыак буоларын, дойдуларын көмүскээбит дьону умнубат туhугар оҥоhулларын кэпсээтилэр.
Бу икки выпускникпыт историялара барыларын сүрэхтэрин таарыйда:
• Николай Павлов (2018 сыллааҕы выпускник) оҕо эрдэҕиттэн айымньылаах уонна көхтөөх этэ: ырыаhыт, үҥкүүhүт, спордунан дьарыктанара. Музыкальнай кэллиэс кэннэ разведчигынан сулууспалаабыта уонна бойобуой сорудаҕы толоро сылдьан дьоруойдуу өлбүтэ.
• Роман Афанасьев (2022 сыллааҕы выпускник) оскуола биир бастыҥ үөрэнээччитэ этэ: спортсмен, оскуола тэлэбиидэнньэтин дииктэрэ, актыбыыс уонна бырааhынньык ыытааччыта. Аармыйаҕа сулууспалаан, ол кэннэ полицияҕа үлэлээн баран, эмиэ дойдутун көмүскүү барбыта уонна дьоруойдуу өлбүтэ.
Метроном тыаhыгар биир мүнүүтэ чуумпуруу кэннэ ытыктабыллаах ыалдьыттар тыл эттилэр: улуус, нэһилиэк баhылыктара, оскуола дириэктэрэ, дьоруойдарбытын үөрэппит учууталлар уонна, саамай сүрүнэ, биhиги дьоруойдарбыт ийэлэрэ. Кинилэр хорсун быhыы, иэс уонна биhиги иннибит диэки эйэлээх халлаан иhин олохторун толук уурбут дьону өйдөөн кэлэрбитигэр олус улахан суолталааҕын туhунан эттилэр.
Төрдүс кылаас үөрэнээччилэрэ бэлэмнээбит хоhоонноро линейканы долгутуулаахтык түмүктээтэ.
Билигин биhиги оскуолабытыгар анал миэстэ баар – «Дьоруой муннуга». Кини хас биирдии үөрэнээччигэ дьоруойдар кинигэлэргэ эрэ буолбакка, биhиги ортобутугар баалларын өйдөтүөҕэ. Бу биhиги киэн туттар буойуттарбыт, төрөөбүт сирдэригэр, дьиэ кэргэттэригэр уонна дойдуларыгар кырдьыктаах тапталы көрдөрбүттэрэ. Кинилэр хорсун быhыылара биhиги сүрэхтэрбитигэр үйэ-саас тухары хаалыаҕа.
Сиһилии видео-матырыйаалга көрүҥ:
Кирсан Кириллов, Иван Петров, С.П.Данилов аатынан Бэрдьигэстээх орто оскуолатын
«Сайдам» медиакиин юнкордара