Ахсынньы 9 күнүгэр Арассыыйаҕа Аҕа дойду Дьоруойдарын күнэ бэлиэтэнэр. Аҕа дойдуну көмүскүүр Улуу сэрии ааспыта номнуо ыраатта. Эһээлэрбит уһансыбыт эйэлээх олоххо олорон үүнэн-сайдан, кэскилбитин кэрэһэлээн олорон кэллибит.
Былырыын, арҕаа дойдулар утары туруоран, Украина дойдутун кытары атааннаһан, анал байыаннай дьайыы саҕаламмыта.
Ньурба оройуонун 1-Хаҥалас нэһилиэгиттэн элбэх киһи бэйэтин үрдүк иэһин ылынан Украинаҕа баран дойдуларыгар иэстэрин төлүү сылдьаллар. Олор истэригэр биэс бырааттыылар – Курышевтар анал байыаннай дьайыыга кыттыыны ыла сылдьаллар. Биһиги эдэр кэрэспэндиэммит Миша Никифоров аҕата Николай биирдэстэрэ буолар. Бу уолаттар ийэлэрэ Марина Николаевна Хаҥаласка олорор. Кини элбэх оҕолоох, олортон 5-һэ билигин Украинаҕа сылдьаллар. Бу бырааттыылартан бастаан кыралара былырыын эпэрээссийэ саҕаланыыта барбыта, онтон утуу-субуу 4 убайдара бардылар. Бүтэһигинэн саамай улахан убайдара, байыаннай дьайыылар бэтэрээннэрэ, иэһин төлүү аттаммыта. Буойун бырааттыылар бары араас хайысханнан хорсуннук сылдьаллар. Миша аҕата Николай бу күһүн саҥа барбыта. Кини биһиги оскуолабыт үлэһитэ. Никифоровтар барыта алта оҕолоохтор: 4 уол, 2 кыыс. Улахан уолаттар быйыл ыал буолбуттара. Иккис уол Гриша аармыйаҕа сулууспалаан кэллэ. Улахан уол Вася сотору эмиэ барыахтаах. Онон Миша дьиэтээҕи хаһаайыстыбатын ийэтинээн, быраатынан Радомирдыын бэйэлэрэ көмөлөөн көрөллөр. Аҕалара эргиллэн кэлэрин күүскэ күүтэллэр.
Аҕа дойдубутугар ыарахан уонна эппиэтинэстээх кэмҥэ биһиги хорсун эр дьоннорбут санааларын ууран, ыҥырыыны ылынан анал байыаннай дьайыыга кытта сылдьалларыттан биһиги киэн туттабыт! Эйэлээх олох түргэнник эргиллэригэр уонна буойуттарбыт этэҥҥэ кэлэллэригэр баҕарабыт.
Анжелина Жданова, «Ыллык» пост, Ньурба, Хаҥалас.