Үгэскэ кубулуйбут, эргэ сылы түмүктүүр биир улахан тэрээһининэн Ил Дархан Харыйата буолар. Хас сыл аайы өрөспүүбүлүкэбит араас муннуктарыттан бастыҥтан бастыҥ уерэнээччилэр Саха циркатын киэҥ туонатыгар мусталлар.
Быйыл Ил Дархан Харыйатыгар А.П. Илларионов аатынан Хайахсыт орто оскуолатыттан 11 кылаас үөрэнээччитэ Вадим Колесов барар чиэскэ тигистэ.
Вадим киирэн кэллэҕинэ тулабыт барыта сырдыырга диэри буолар. Кини олус аһаҕас, элэккэй, кэпсэтинньэн. Кини оҕо эрдэҕиттэн туйгуннук үөрэнэр, туохха барытыгар көхтөөхтүк, харса суох кыттар. Хоһоон да ааҕар, оһуохайдыыр даҕаны. Уруһуйдуур, уһанар, айар. Бэйэтин кыанар, спордунан дьарыктанар. Улуустааҕы, өрөспүүбүлүкэтээҕи олимпиадалар, күрэхтэр, «Инникигэ хардыы» научнай-практическай конференция кыайыылаҕа, «Кэскил» оҕо бэчээтин кыһатын эдэр кэрэспэдьиэнэ, «Ассамблея школьников Якутии» общественнай түмсүү чилиэнэ, «Эрэл» оҕо хамсааһынын бэрэссэдээтэлин солбуйааччыта. Бу барыта – биһиги Вадиммыт!
«Кэскил» оҕо бэчээтин кыһатыгар кэрэспэдьиэнинэн үлэлээн ситиһиитэ үгүс. Быйыл сайын 8-с төгүлүн ыытыллыбыт «Азия оҕолоро» спортивнай оонньууларга пресс-кииҥҥэ үлэлиир чиэскэ тиксибитэ.
От ыйыгар саамай чаҕылхай кэрэспэдьиэннэр ахсааннарыгар киирэн Россия киин куоратыгар Москваҕа журналистика хайысхатыгар үөрэммитэ.
Россиятааҕы «Движение первых» хамсааһын чэрчитинэн, «Отличники Первых» диэн тематическай сменаҕа Владивосток куоракка «Океан» лааҕырга сынньаммыта.
Быйыл күһүн «Кэскил» оҕо бэчээтин кыһата тэрийэн ыыппыт биир дойдулаахпыт, Россия сенатора, Саха өрөспүүбүлүкэтин Президенэ, бастакы Ил Дархана Егор Афанасьевич Борисовы кытта пресс-конференцияҕа кыттыыны ылбыта.
Ити курдук биһиги Вадиммыт олус чаҕылхай, бары өттүнэн барытынан дьоҕурдаах, ураты көрүүлээх. Хас биирдии оскуола оҕотугар кини холобур буолар.
Биһиги Вадиммытыгар эксээмэннэрин ситиһиилээхтик туттаран, баҕалаах үөрэҕэр киирэригэр баҕарабыт. Өссө да үрдүктэн үрдүк дабайыылары, Вадим!
Лилия МАРКОВА, VIII кылаас,
А.П. Илларионов аатынан Хайахсыт орто оскуолата, Чурапчы