Хаан тохтуулаах сэрии сыллара ырааттар ыраатан иһэллэр. 77 сыл ааста ол да буоллар киһи аймах баарын тухары сэрии алдьархайа умнуллубат.
Биһиги нэһилиэкпитигэр соҕотох сэрии бэтэрээнэ Николай Семенович Назаров олорор. Сыллата оскуола үөрэнээччилэрэ фронтовик-бэтэрээни эҕэрдэлииллэр, кини кэпсээнин истэллэр.
Быйыл эмиэ ол үгэһинэн оскуолабыт үөрэнээччилэрэ Николай Семеновиһы, тыыл бэтэрээннэрин уонна сэрии сылын оҕолорун эҕэрдэлээтилэр, кэпсээннэрин иһиттилэр. Ол курдук, 7 уонна 2 кылаас үөрэнээччилэрэ сэрии бэтэрээнин Н.С. Назаров, тыыл бэтэрээнин Социалистическай үлэ Геройа Е.И. Новгородова олбуордарыгар көрсөн эҕэрдэлээтилэр, ырыа ыллаатылар, хоһоон аахтылар.
Ийэ дойду көҥүлүн иһин геройдуу охсуспут буойуннар, тыылга кыайыыны уһансыбыт дьоммут ааттара-суоллара үйэлэргэ умнуллуо суоҕа, көмүс буукубанан историяҕа суруллар. Кинилэр ааттарын үйэтитии билиҥҥи көлүөнэ ыччат ытык иэспит.
Бэлэмнээтилэр Валя СПИРИДОНОВА 10 кыл., Айгылаан Кычкин 7 кыл. үөрэнээччилэрэ,
«Кустук» устуудьуйа кэрэспэдьиэнэ уонна оператора.