Бастатан туран, оскуолабытыгар физкультура учууталынан үлэлии сылдьар Афанасий Степанович Дьячковский 2004 с. буолбут III-с «Азия оҕолоро» оонньууга кыттан үрүҥ көмүс призер буолар. Киниттэн ол кэм туһунан ыйыталаспыппар маннык эппиэттээтэ:
«Мин 6 кылаастан Горохов Егор Николаевич салайар мас тардыhыы спортивнай секциятыгар дьарыктаммытым. Саас, мин ахсыс кылааһы бүтэрэн эрэрим, оскуолабыт завуһа Архипова Дария Афанасьевна Майаҕа сбордана барын диэбитэ. Чыамайыкыттан 4 буолан барбыппыт: Явловский Виктор, Васильев Алик, Романов Алёша уонна мин.
Төрдүс бүтэһик отборочнай күрэхтэһиигэ Хатаска бардыбыт. Мин ыйааһыммар үс отборочнай күрэхтэһии түмүгүнэн 4 лидер уолаттар биллэллэр этэ: Кузьмин Степа (Амма), Окороков Вася (Мэҥэ-Хаҥалас), Канащук диэн Ньурба уонна Данилов диэн Таатта уола. Группаларга араартаатылар уонна күрэхтэстибит. Полуфиналга төрдүө буолан таҕыстыбыт: Кузьмин, Окороков, Канащук уонна мин. Хаһан да кыайбатах Окороков Васябын 2:0 кыайан финалга таҕыстым. Кузьминтан 1 маһы ыллым (4 отборочнай күрэхтэһии тухары киниттэн биир да маһы уолаттар ылбатах этилэр), иннэ гынан “Саха-2” хамаандаҕа киирэн, III «Азия оҕолоро» норуоттар икки ардыларынааҕы спортивнай оонньууга кыттар буоллум. Сайын куоракка «Алаас» санаторийга сборбут буолбута, дьарыкпыт «Модуҥҥа», «Чочур Мырааҥҥа» күҥҥэ иккитэ буолар этэ. Нэдиэлэ аайы перекидка буолара. Тренердарбыт куораттан Александр Александрович Захаров уонна Амматтан Афанасий Владимиров дьарыктаабыттара.
«Азия оҕолоро» спортивнай оонньуубут буолар күнэ үүннэ. Бастакы күҥҥэ сахалыы атах оонньуута көрүҥҥэ күрэхтэһии буолла, онно бастакы 3 миэстэни барытын саха хамаандалара ылбыттара. Ол иhин икки саха хамаанданы («Саха-3», «Саха-4») күрэхтэһииттэн устан кэбистилэр. Мас тардыһыы бүтэһик күн буолла, ол иһин атын күрэхтэһиини көрбөккө ыйааһын түһэрэ, дьарыктана сырыттыбыт. Ыйааһыннанаат 1 чаас буолан баран күрэхтэһиибит «Туймаада» стадиоҥҥа саҕаланна. Бастакы эргииргэ Кузьмиммар түбэһэн 2:0 хоттордум. Мас тардыһыыны кэлбит омуктар оччолорго сатаабат этилэрэ, судьуйаны көрөн баран олороллоро. Биэстэ киирсэн, 2 миэстэ буолбутум.
«Азия оҕолоро» норуоттар икки ардыларынааҕы спортивнай оонньуу сабыллыытыгар мэтээллээх эрэ буолаххына киллэрэр этилэр. Элбэх биллиилээх ырыаhыттар кэлэн ыллаабыттара: Юлия Савичева, Пьер Нарцисс, Ираклий уо.д.а бааллара. Бу артыыстары олох чугастан көрбүтүм, ырыаларын истибитим. Сборнай формам бэргэһэтин панаманы индус уолга бэлэхтээбитим.»
Хаңас тренера Горохов Е.Н.
Иккиһинэн, 2016 с. Дьокуускай куоракка буолбут VI «Азия оҕолоро» норуоттар икки ардыларынааҕы спортивнай оонньуу арыллыытыгар оскуолабыт «Үрүйэчээн» үҥкүү бөлөҕө (13 оҕо, сал. З.Н.Прокопьева) биир сүрүн уопсай туруорууга кыттыыны ылбыта.
Эрчим Куприянов, VII кылаас,
«Проба пера» эдэр корреспондена, Чыамайыкы, Мэҥэ Хаҥалас