Герой диэн — ураты хорсун быһыыны оҥорбут, эр санаалаах, дьулуурдаах киһи. Биһиги ийэ дойдубутун хорсуннук көмүскээбит эһэлэрбит, эбэлэрбит курдук Геройдар бүгүҥҥү олохпутугар бааллар, ааттара ааттанар. Кинилэртэн биирдэстэрэ биһиги биир дойдулаахпыт «Эр санаа» уордьан кавалера Степан Степанович Руфов буолар. Оскуолабытыгар Геройга анаммыт үөрэнэр паарта баар.
Степан Руфов 1997 сыллаахха балаҕан ыйын 16 күнүгэр Үөһээ Бүлүү улууһун Дүллүкү нэһилиэгэр төрөөбүтэ. Оскуолаҕа үөрэнэр сылларыгар бастыҥ активист, чэпчэки атлетикаҕа, баскетболга, спорт национальнай көрүҥнэригэр оскуолатын, улууһун чиэһин элбэхтэ көмүскээбит бастыҥ спортсмен.
Оскуоланы бүтэрээт Забайкальскай байыаннай уокурук 11-с десантнай-штурмовой биригээдэтигэр суһал сулууспаны ааспыта. Сулууспа кэмигэр парашютунан 11-дэ ыстанан, «Парашютист- отличник» бэлиэнэн наҕараадаламмыта. Огневой, тактическай, строевой бэлэмэ «туйгунунан» бэлиэтэммитэ.
2016 сыллаахха Николай Гаврилович Чернышевскай аатынан Бүлүүтээҕи педагогическай кэллиэскэ физкультура салаатыгар үөрэнэ киирбитэ. Кэллиэскэ хотугу многоборьенан утумнаахтык дьарыктаммыта. Улуус, өрөспүүбүлүкэ күрэхтэһиилэригэр чемпион, призер аатын элбэхтэ ылбыта. «Хорсун» диэн байыаннай- патриотическай кулууп лидерэ этэ.2019 — 2020 сылга Үөһээ Бүлүүтээҕи Оҕо спортивнай оскуолатын тренеринэн, 2020 сылтан Хомустаах сүрүн оскуолатыгар физкультура учууталынан үлэлээбитэ. Иллэҥ кэмигэр бултуура, балыктыыра. Үтүө санаалаах, эйэҕэс майгылаах буолан, элбэх доҕордооҕо.
Онтон гвардия рядовойа Степан Степанович 74854 нүөмэрдээх байыаннай чааска разведчик быһыытынан сулууспалаабыта.
2022 сыллаахха бэс ыйын 8 күнүгэр суһал байыаннай дьайыы кэмигэр анал сорудахха барар. Утарылаһааччы ханан баарын Степан бастакынан билэн уоту аһар. Кини түргэн уонна хорсун дьайыытыттан өстөөх чугуйар. Хорсун байыас ыараханнык бааһырар. Степан Ийэ дойду көмүскэлигэр тыынын толук уурбута.
Арассыыйы Президенэ В. В. Путин бэс ыйын 20 күнүнээҕи ыйааҕынан буойун иэһин чиэстээхтик толорбутун иһин «Эр санаа» орденынан наҕараадалаабыта.
Степан Степанович Руфов эрэллээх доҕор, хорсун буойун, төрөөбүт дойдубут патриотын быһыытынан биһиги өйбүтүгэр-санаабытыгар мэлдьи тыыннаах. Геройдар, патриот дьон баар буолан, бүгүҥҥү олохпут туруктаах, инникилээх. Кинилэр тустарынан кэпсиир, кинилэри үйэтитэр — биһиги ытык иэспит.
Сиһилии:
Алина Санникова, 11 кылаас, «Эрчим» медиакиин, Дүллүкү, Үөһээ Бүлүү