Сэтинньи 8 күнэ Мэҥэ Хаҥалас улууһун олоҕор ураты суолталаах кэрчик кэм буолла. Бу күн Арассыыйа Дьоруойа, саха норуотун күүһүн, хорсунун бэлиэтэ буолбут Родимир Максимов-Бурхаат төрөөбүт Тааттатыттан кэлэн, биһиги улууспутугар ыалдьыттаата. Бу улуу киһи кэлиитэ эдэр ыччакка патриотизм тыынын иҥэрдэ, улууспут олохтоохторугар үрдүк чиэһи бэлэхтээтэ.
Бу үөрүүлээх түгэҥҥэ Р.Г. Васильев аатынан Кыраайы үөрэтэр түмэлгэ «Сулус суоллаах» диэн ааттаах анал быыстапка арылынна. Бу быыстапка Родимир Максимов эйэлээх олоҕун кэрчиктэриттэн саҕалаан, бойобуой суолун, хорсун быһыыларын толору сырдатар. «Сулус суоллаах» диэн аат кини олоҕун суола дойдуга бэриниилээх буолууну туоһулуурун уонна хорсун быһыы сулуһунан сирдэтэрин көрдөрөр.
Быыстапка экспозицията Дьоруой төрөөбүт сирин, эдэр сааһын, байыаннай үөрэҕин, ону тэҥэ, хорсун быһыытын иһин ылбыт наҕараадаларын хаартыскаларынан уонна докумуоннарынан толору көрдөрөр. Түмэл үлэһиттэрэ бу экспозицияны оҥорон, Дьоруой олоҕун суола кэлэр көлүөнэҕэ үтүө холобур буоларын ситиһэллэр. Родимир Максимов-Бурхаат – саха киһитэ дойдутун туһугар бэйэтин олоҕун харыстаабакка туруулаһарын туоһута.
Бу тэрээһин сүрүн суолтата – эдэр ыччаты иитии. Дьоруой холобура саамай күүстээх патриотическай иитии буолар. Кини хорсун быһыыта, бэриниилээх буолуута – дойдуга таптал, чиэс уонна эппиэтинэс үрдүк холобура. «Сулус суоллаах» быыстапкаттан көрөөччүлэр кини олоҕун туһунан элбэҕи сиһилии билэн, хорсун быһыытын сөҕөн, инники кэлэр көлүөнэлэргэ кини туһунан кэпсээн, холобур оҥостуохтара диэн эрэнэбит.
Бүгүҥҥү тэрээһин Родимир Максимов-Бурхаат аатын үйэтитэр, саха норуотун күүһүн-уоҕун бэлиэтиир биир суолталаах түгэнинэн буолла.
Сиһилии видео-матырыйаалга көрүҥ:
Снежана Яковлева, 9 «а» кылаас үөрэнээччитэ,
Ф.Г. Охлопков аатынан Майа орто оскуолата,
«Түмэн» медиа-киин кэрэспэдьиэнэ.
keskil14.ru