Биирдэ бэриллэр олоххо бэйэтин олоҕун бүтүн Аан дойду туһугар ууран биэрбит, хорсун быһыылаах, үтүө майгылаах, биһиги биир дойдулаахпыт, киэн туттар киһибит – Николай Егорович Кельциев туһунан кэпсиэхпитин баҕарабыт.
Рядовой, анал байыаннай операция кыттыылааҕа, «Хорсунун иһин» мэтээлинэн наҕараадаламмыт Кельциев Николай Егорович 1992 сыллаахха бэс ыйын 8 күнүгэр Нөмүгү нэһилиэгэр күн сирин көрбүтэ. Эһэтин аатынан Коля диэн сүрэхтээбиттэрэ.
Николай Егорович оҕо сааһа төрөөбүт Нөмүгүтүн сиригэр-уотугар ааспыта. 1999 сыллаахха Ой орто оскуолатын боруогун атыыллаан бастакы кылааска киирбитэ. Оскуолаҕа үөрэнэр сылларыгар истиҥ, эйэҕэс доҕор, туохтан да толлон турбат, элэккэй майгылаах үөрэнэччи буолара.
2008 сыллаахха тохсус кылааһы бүтэрэн, баҕа санаатын толорон Жатайдааҕы 5 нүөмэрдээх профессиональнай лицейга повар үөрэҕэр үөрэнэ киирбитэ. Лицейы 2011 сыллаахха 4 разрядтаах повар, 3 разрядтаах кондитер идэлээх ситиһиилээхтик үөрэнэн бүтэрбитэ уонна тутатына Российскай Армия кэккэтигэр ыҥырыллан сулуспалыы барбыта. Кини 2011-2012 сс Хабаровскай куоракка ракетно-техническай войскаҕа чиэстээхтик сулуспалаан, ытык иэһин толорон дойдутугар кэлбитэ.
2012 сылтан таптыыр идэтинэн, поварынан үлэтин саҕалаабыта уонна анал байыаннай операцияҕа барыар дылы үлэлээбитэ.
2017 сыллаахха олоҕун аргыһын, тапталлаах доҕорун Юляны көрсөр, 2018 сыллаахха уол оҕоломмутара – Артур диэн сүрэхтээбиттэрэ, 2019 сылга Юлятынаан сокуонунан ыал буолбуттарын бигэргэппитэрэ. Дьокуускай куоракка олохсуйан олорор санаалаах дьиэ ылынан ньир-бааччы олорбуттара.
2022 сыл алтынньы ыйга анал байыаннай операцияҕа мобилизациянан ыҥырыллан сулууспалыы барбыта. 25573 байыаннай чааска: наводчик гранатометного отделения взвода огневой поддержки штурмовой роты мотострелкового батальона түбэспитэ.
2023 сыл атырдьах ыйыгар кылгас уоппускаҕа кэлэн дойдутугар чугас, тапталлаах дьонун ортотугар сылдьан, сынньанан барбыта.
2024 сыл олунньу ый 13 күнүгэр геройдуу анал байыаннай операция буола турар Украина дойдутугар сэрии толоонугар сырдык тыына быстан олохтон эдэркээн сааһыгар туораабыта.
Кини оҥорбут хорсун быһыыта сыаналанан, «Орден Мужества» государственнай наҕараада өлбүтүн кэннэ иҥэриллибитэ.
“Коля оҕо эрдэҕиттэн бултуурун, балыктыырын, уһанарын сөбүлүүрэ. Эйэҕэс майгылаах, туруоруммут сыалын ситиһэр, куруутун күлэ-үөрэ сылдьар оҕонон өйдүүбүт. Эдэри кытта эдэрдии, саастаах дьону кытта дьоһуннук кэпсэтэн, кими да туора көрбөккө көмөтүн ууна сылдьара…”
“Мин баар суох биир соҕотох убаайым олус сэмэй, бэһиэлэй, куруук күлэ-үөрэ, мичээрдии сылдьар киһи этэ. Хаһан даҕаны хомойбутун, кыыһырбытын көрдөрөөччү суоҕа. Кини куруук дьон үтүөтүн, олох кэрэтин эрэ кэпсээччи. Убаайым биһиги, оҕолорбут, инники кэскилбит сырдык ыраас халлаан анныгар олороллорун туһугар тыына быстыбытын, дьон өйдүөхтээх, билиэхтээх дии саныыбын. Кини аатын ааттата туруохпут, өрүү сурэхпитигэр илдьэ сылдьыахпыт”.
Николай Егорович хорсун быһыыта, үтүө майгыта – инники кэскилгэ холобур буола туруо диэн эрэнэбит. Кылгас да кэмнэ сырдык, ыраас, элбэх умнуллубат тургэннэрдээх, ол эрэн өссө да элбэҕи көрбөтөх, билбэтэх олохтоох биһиги уолбут — өрүү биһиги сүрэхпитигэр.
Иванна Мордовская, XI кылаас
Ой орто оскуолата