Герой диэн кимий? Герой киһи аайы тус-туспа. Кимиэхэ эрэ чугас киһитэ – аҕата, эһэтэ, кимиэхэ эрэ кинини ыарахантан быыһаабыт доҕоро-атаһа, эбэтэр олох билбэт киһитэ. Ол эрээри уопсай өйдөбүлгэ «ГЕРОЙ» диэн үрдүк ааты дойдутун, дьонун харыстыыр, көмүскүүр, араҥаччылыыр киһи.
Билигин тыҥаан турар анал байыаннай дьайыы үгүс элбэх тургутууну аҕалла. Биһиги биир дойдулаахтарбыт онтон толлон турбакка улахан эппиэтинэһи сүгэн, бэйэлэрин олохторун толук ууран сэрии толоонугар сылдьаллар. Амма улууһуттан эр санаалаах убайдарбыт, аҕаларбыт, эһэлэрбит ийэ дойдуларын көмүскүү ыҥырыллан, бэйэлэрэ тылланан барбыттара. Манна сылдьар хас биирдии киһи бары ГЕРОЙДАР! Кинилэри чиэстээн оскуолаҕа араас өйдөбүнньүк стендэлэри, паарталары, баннердары, пааматынньыктары онтон да атыттары оҥорон үйэтитэллэр. Биһиги оскуолабыт, академик Л. В. Киренскэй аатынан Амма лиссиэйигэр биир дойдулаахпытын, үөрэммит оҕобутун сырдык аатын үйэтитэр, холобур оҥорор сыалтан стендэ уонна паарта оҥоһуллубута.
Ааспыт үөрэх дьылыгар Аҕа дойду сэриитигэр сылдьыбыт буойуннарга анаан оҥоһуллубут стендэ аттытыгар кэккэлэһэ билигин анал байыаннай дьайыыга хорсун быһыыны оҥорон «Герой России» диэн үрдүк ааты ылбыт чулуу дьоммутун мэтириэттэрин сыһыарбыттара. Кинилэргэ махтана, киэн тутта улаатарбытыгар анаан оҥорбуттара олус суолталаах. Биһиги киһи буолан тахсарбытыгар, сиэргэ-майгыга, хорсун буоларга улахан оруоллаах. Бу стенда көрүдүөргэ эрэ буолбакка, ОБЗиР хоһугар эмиэ иилиллэн турар.
Маны таһынан биһиги оскуолабытыгар үөрэммит Александр Сысолятин сырдык аатын үйэтитэр герой паартата оҥоһуллан 2024 сыл муус устар 11 күнүгэр олоххо киирбитэ. Александр Сысолятин хорсун быһыытын элбэх мэтээлэ, уордьана туоһулууллар. Анал байыаннай дьайыыга сылдьан, хомойуох иһин, хорсуннук, олус эдэр сааһыгар күн сириттэн күрэммитэ. Кини аатын үйэтитэн оҥоһуллубут паартаҕа саамай бастыҥтан-бастыҥ оҕолор эрэ олороллор. Бу аата кини курдук эппиэтинэстээх, сырдык санаалаах, барытыгар кыһамньылаах буоларга уһуйар остуол. Оҕолор бу паартаҕа олороору үөрэх устатын тухары олус кыһаллаллар, кини паартатыгар олордохторуна чахчы кыһамньылаах үрдүк аатын ылаллар. Паарта алын кылаастар оскуолаларыгар баар. I-IV кылааска диэри аҕыс кылааһы хабан көһөрүллэ сылдьар. Билигин III «а» үөрэнээччилэриттэн үөрэх туйгуннара, араас күрэстэр кыайыылаахтара Айта Лобанова уонна Настя Эверстова, иккис сменаҕа IV «а» кылаас оҕолоруттан Айта Дьяконова уонна Тимур Шараборин олороллор.
Оскуола иһигэр байыаннай дьыалаҕа сылдьар хорсун буойуннарбытыгар анаммыт араас тэрээһиннэр ыытыллаллар. Кинилэр дьиэ кэргэттэригэр көмө-тирэх, өйөбүл, сырдык сыһыан барыта баар. Олохторун кэрэйбэккэ, буулдьа аннынан сылдьар хорсун-хоодуот дьоммутугар, олохторун толук биэрбит ытык саллааттарбытыгар махталбыт муҥура суох. Кыайыы көтөллөөх түргэнник дьиэҕитигэр, төрөөбүт дойдугутугар кэлэ охсоргутун баҕарабыт.
VIII кылаас үөрэнээччилэрэ
«АЛиК» медиа-киин
Л.В. Киренскэй аатынан Амматааҕы лиссиэй
keskil14.ru