Кулун тутар 6 күнүгэр Дьокуускай куоракка Гагарин аатынан култуура уонна аныгы искусство киинигэр ыытыллыбыт Саха Өрөспүүбүлүкэтин Бырабыыталыстыбата 2024 сыллаах үлэтин отчуотугар сырыттым.
Сүрүн дакылаата Саха Өрөспүүбүлүкэтин Бырабыыталыстыбатын бэрэссэдээтэлэ Кирилл Евгеньевич Бычков оҥордо. Отчуоттуур мунньахха 2024 сыл устата туох үлэ ыытыллыбытын уонна 2025 сылга туох үлэ ыытыллыахтааҕын, куорат олохтоохторо туохха болҕомто ууруохтаахпытын туһунан кэпсээтэ.
Кэнники биэс сылга Дьокуускай куорат сайдыытыгар национальнай социальнай инициатива хайысхатынан 26 млрд. солк көрүллүбүт. Сахабыт сирин киин куоратын сайдыытыгар өрөспүүбүлүкэ Бырабыыталыстыбата сүрдээх улахан көмөнү оҥорор. “Мастер-план” программаны олоххо кииллэрии чэрчитинэн, 2024 сылга Дьокуускай куорат киин болуоссатын – Ленин аатынан болуоссаты саҥардан, тупсаран тутуу буолар. Бу ааспыт сыл биир саамай улахан ситиһиитэ, үлэтэ. Маны таһынан Сайсары күөл кытылын, Ийэ скверин, Роман Дмитриев аатынан Набережнай кытылын тупсарыы үлэтэ ыытыллыбыт. Уопсайынан, “Мастер-план” программанан өрөспүүбүлүкэ үрдүнэн 33 араас тэрээһин ыытыллыбыт, 90 объект тутуллубут.
Быйыл дойдубут үрдүнэн Улуу Кыайыы 80 сылын бэлиэтиибит. Бу олус улахан суолталаах бүтүн норуот өйдөбүлэ буолар. 2025 сыл Россияҕа Аҕа дойдуну, Саха Өрөспүүбүлүкэтигэр Ийэ дойдуну көмүскээччилэр сылларынан биллэриллибитэ.
Саха сирэ анал байыаннай дьайыылар саҕаланыахтарыттан ыла күүс-көмө буолар. “Якутия с тобой!” общественнай холбоһук, “#МЫВМЕСТЕ” штаб, волонтерскай хамсааһыннар күүскэ үлэлииллэр. Анал байыаннай дьайыылар буола турар сирдэригэр Саха сирэ 240 тонна гуманитарнай көмөнү оҥорбут. Улахан көмө анал байыаннай дьайыыларга кыттыыны ыла сылдьар дьоҥҥо, кинилэр дьиэ кэргэттэригэр оҥоһуллар.
Саха сирэ биһиги хос эһэлэрбит Аҕа дойду Улуу сэриититигэр Улуу Кыайыыны ситиспиттэрин курдук, биһиги дойдубут кыайыылаах буолуоҕа диэн күүстээх санааҕа кыттыһан көмөлөһөр, туора турбат.
Алиада БАСНАЕВА, VIII “Г” кылаас,
17 №-дээх оскуола, Дьокуускай
Алеся Николаева хаартыската, VIII “Г” кылаас