Үөрэх дьыла түмүктэнэн, оҕолорго сайыҥҥы сынньалаҥ саҕаланна. Амма улууһун Эмис нэһилиэгин оҕолоро үөрэх дьылын устата тустуу секциятыгар хайдах дьарыктанан тугу ситиспиттэрин туһунан түмүк санааларын бэйэлэрин дневниктэригэр суруммуттар. Кинилэр Саха өрөспүүбүлүкэтин үтүөлээх тренерэ Аркадий Николаевич Тастыгин салалтатынан дьарыктаналлар.
ЭДЭР БӨҔӨСТӨР ДНЕВНИКТЭРИТТЭН — 2
28.05.2024. Аммаҕа буолбут күрэхтэһии кэнниттэн өссө күүскэ дьарыктанарым наада эбит диэн толкуйдаатым. Аныгыскы сырыыга кыайар гына. Дьарыгы көтүтүмүөхпүн наада. Тустууга билбит приемнарбын сайын устата оҥоро сылдьыам. Тренербит Аркадий Николаевич “тустуу туһунан хас сөкүүндэ, мүнүүтэ аайы саныы сылдьыҥ” диэн эппитин арааһа, өйдөөтүм быһыылаах.
Айгылан Николаев, VI кылаас
***
28.05.2024. Мин тустуу секциятыгар сэтинньи ыйтан дьарыктанабын. Тренер диэн биһигини эрчийэр, дьарыктыыр киһи. Тустуу приемнарыгар үөрэтэр. Дьарыкка кэлэн баран бастаан разминкаланабыт, сүүрэбит, футболлуубут, басткетболлуубут. Мин быйыл Илья Анатольевич Солдатов турнирыгар бастакы миэстэни былдьаһа сылдьан, кыайтаран, иккис миэстэ буолбутум. Чемпион буолбатым диэн хомойбутум. Кыайыы элбэх дьарыктан кэлэр. Киһи кыайдаҕына наһаа үөрэр. Онтон кыайтарыы диэн наһаа хомолтолоох. Кыыһыраҕын аҕай. Аныгыскы сырыыга син биир кыайыам диигин уонна күүскэ дьарыктанан бараҕын.
Тустууга билбит приемнарбын сайын устата хатылыы сылдьыам. Биир улахан ыра санаам –акробатикаҕа үөрэниэхпин баҕарабын.
Тустуу секциятыгар сылдьаммын, Сахаачча туһунан биллим. Аммаҕа бара сылдьан Сахаачча паамытынньыгын көрбүппүт. Улахан тустуук буоллаххына, дьон эйигин умнубат эбит дии санаатым.
Алик Ноговицын, II кылаас
***
28.05.2024. Бастаан тустуу секциятыгар кэлэн баран билбэтим элбэх этэ. Хас күн аайы дьарктанабыт. Күнүс икки чаастан. Билигин опыттанным диэн бэйэбин сыаналыыбын. Аркадий Николаевич саас биһигини Тындаҕа сборга илдьэ сылдьыбыта. Поеһынан айаннаабыппыт. Бу биһиги аан бастакы айаммыт этэ. Тиийээт да тута дьарыктанан барбыппыт. Сылайар этибит. Онтон күрэхтэһии буолбута. 52 кг тустубутум. Бастакы миэстэ буолбутум. Кубок, грамота, мэтээл уонна 2 тыһ. харчы биэрбиттэрэ. Бу мин аан бастакы кыайыым этэ. Наһаа үөрбүтүм. Онон тустуу секциятын ситиһиилээхтик түмүктээтим. Сайын оттуубун. Оттуу сылдьан тустуу приемнарын наар саныы, оҥоро сылдьыахтаахпын.
Семен Васильев, V кылаас
***
28.05.2024. Тустуу албастарыгар үөрэнним. Элбэх прием баар эбит. Ону барытын билэргэ уонна тустууга туһанарга элбэх дьарык наадатын өйдөөтүм. Илья Анатольевич Солдатов турнирыгар үһүс миэстэ буоламмын спальнай мешок, грамота, мэтээл ылбытым. Убайым Дмитрий Николаевич Солдатов скоростоной велосипед биэрбитэ. Тустуунан дьарыктанар үчүгэй да эбит диэн үөрбүтүм аҕай.
Онтон Аммаҕа буолбут күрэххэ иккитэ кыайтарбытым, биирдэ хотторбутум. Үһүс миэстэ буолбутум. Кыайтарар диэн куһаҕан баҕайы. Тугу кыайбатым, туохха сыыстым диэн наар ону толкуйдуугун. Сайын устата тустууга билбит приемнарбын наар хатыылыы сылдьыам. Аны күһүн барытын саҥаттан саҕалаабат курдук.
Дамир Солдатов, VI кылаас
***
28.05.2024. Тустуу секциятыгар 2023 сыл ахсынньы 18 күнүгэр кэлбитим. Тренербит Аркадий Николаевич Тастыгин үчүгэй киһи. Көрдөххө, кытаанах эрээри, иһигэр сымнаҕас. Барытын быһааран биэрэр. Үчүгэй баҕайытык массажтыыр. Илиитэ сылаас баҕайы.
Бастакы улахан сыалбыт Эмискэ буолар Илья Анатольевич Солдатов аатынан турнирга үчүгэйдик кыттыахтаахпыт диэн этэ. Ол наһаа улахан эппиэтинэс буоларын тренербит өйдөппүтэ. Өссө уолаттарга барыбытыгар наһаа үчүгэй футболка бэлэхтээбиттэрэ. Мин бу турнирга кыайбытым. Наһаа астыммытым. Дьоннор ытыстарын таһынан, хаһытаан-ыһытаан миигин күүскэ өйөөбүттэрэ. Кыайан баран, “һуу, хата кыайдым” дии санаабытым. Кыайтарбытым буоллар, кыбыстыам этэ. Онтон Аммаҕа буолбут күрэхтэһиигэ бастакы киирсиибэр кыайтарбытым, иккис киирсиибэр кыайбытым, үһүскэ кыайбытым. Түмүккэ иккис миэстэ буолбутум.
Сайын тустуу лааҕырыгар барыахпын баҕарабын.
Даниэл Петров, II кылаас
***
28.05.2024. Тренер диэн биһигини тустууга дьарыктыыр киһи. Мин тустууга киирбитим үчүгэй дии саныыбын. Элбэҕи биллим. Эмискэ буолбут И.А. Солдатов турнирыгар үһүс миэстэ буолбутум. Мэтээл ылбытым, көстүүм биэрбиттэрэ. Бириис ылар үчүгэй. Киһи үөрэр.
Ильяр Солдатов, III кылаас
***
28.05.2024. Тустууга сэтинньи ыйга кэлбитим. Кубок, мэтээл ыллахпына үөрэбин. Өссө дьарыктаныахпын наада. Сайын лааҕырга сылдьыахпын, өссө эрчиллиэхпин баҕарабын.
Костя Платонов, I кылаас
***
28.05.2024. Тустууга сыыһаны оҥорбокко приемнары оҥорон иһиэххэ наада. Кыайар диэн үчүгэй. Кыайтарыы диэн куһаҕан. Хомойоҕун. Ытыыгын. Дьарыкпын өссө күүһүрдүөхпүн наада. Тустууга кыһынтан саҕалаан сайыҥҥа диэри сырыттым. Өссө эрчиллиэм. Тренербит үчүгэйдик үөрэтэр. Кыайабыт, кыайдыбыт диэн санаалаах. Бииргэ дьарыктанар уолаттарбыт кыайдахтарына, биһиги бары үөрэбит. Тоҕо диэтэххэ, тренербит этэрин курдук, биһиги бары биир хамаандабыт.
Алеша Захаров, IV кылаас
***
Эмис нэһилиэгин эдэр бөҕөстөрүн дневниктэрин бастакы чааһа https://keskil14.ru/tustuu-daryk-tynda-blagoveshhenskaj/
Кыайыы үгүс сыранан кэлэр https://vk.com/clip-199463452_456241309?c=1
Кыайыыга сирдиир кимий? Тренер https://vk.com/clip-199463452_456241322?c=1