2022 сыл Сахабыт сиригэр Ил Дархаммыт Айсен Николаев туһаайыытынан Ийэ сылынан биллэриллэн турар. Ол иһин ийэлэрбитигэр болҕомто уураары, биһиги, 8 «а» кылаас оҕолоро, «Ийэ истиҥ мичээрэ — миэхэ мэлдьи сыдьаайдын» диэн ааттаах кэнсиэри бэйэбит туруоран бэлэхтээтибит.
Ийэлэрбит, эбэлэрбит ыҥырыыбытын ылынан, ыалдьыттыы, биһигини көрө-истэ, бииргэ дуоһуйа сынньанан бардылар. Ол эрэн быйыл урукку курдук буолбакка, ийэлэрбитигэр квест-игра оонньотон, кистэлэҥ сорудахтары ааспыттарын эрэ кэннэ, бэлэхпитин биэрбиппит.
Кылаас лидердэрэ Виолетталаах Айсен бырааһынньыгы иилээн-саҕалаан ыыппыттара. Кыргыттар үҥкүү ансаамбыллаах буолан, бэйэлэрэ аныгылыы үҥкүүлэри туруоран, ийэлэрин соһуппуттара. Уолаттар сахалыы сайаҕас хоһоон бэлэхтээн, сценка көрдөрөн, оонньуу-арааһын оонньотон хайҕал тылларын истибиттэрэ.
«Сандаара» кыргыттар ырыа ансаамбыллара, иһирэх ырыа ыллаабыппыт. Түмүккэ, уолаттар ырыа доҕуһуолунан, ийэлэрин ыҥыран бытаан үҥкүүгэ уйдарбыттара – көрөргө олус долгутуулаах этэ.
Ийэлэрбит «Оҕолорбут улаатаннар, барытын бэйэлэрэ дьаһанар буолбуттар эбит» диэн махтанан тарҕаспыттара.
Түгэнинэн туһанан, ийэлэрбитигэр барҕа махталбытын, Сахабыт сирин алмааһыныы кытаанах доруобуйаны, сырдык ыраас тапталы, үөрүү-көтүү аргыстаах дьоллоох олоҕу баҕарабыт.
Сандаара СОФРОНЕЕВА, 8 кылаас үөрэнээччитэ,
«Дьоҕур» пресс-киин, Кэбээйи орто оскуолата.