Горнай улууһун Бэс Күөлэ сэлиэнньэтин баһаартан эмсэҕэлээбит 35 оҕолоох үһүс бөлөҕө «Артек» норуоттар икки ардыларынааҕы кииҥҥэ көттө. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Атырдьах ыйын 25 күнүгэр диэри оҕолор «Сосновый бор» оҕо киинигэр олордулар. Делегация салайааччыта, Атамай оскуолатын дириэктэрэ Мотрена Ефремова оҕолор төрөппүттэрин уонна оскуола салалтатын аатыттан Ил Дархан Айсен Николаевка, өрөспүүбүлүкэ бырабыыталыстыбатыгар уонна «Сосновый бор» оҕо киинин дириэктэригэр, үлэһиттэригэр махталын биллэрдэ.
Санатан эттэххэ бэрэсидьиэн Владимир Путин, дойду бырабыыталыстыбатын уонна Айсен Нколаев соруйуутунан ойуур баһаарыттан эмсэҕэлээбит 200 кэриҥэ оҕо «Орленок», «Артек» уонна «Океан» оҕо кииннэригэр бараллар.
Бастакы бөлөх билигин Краснодарскай кыраайга «Орленокка» сынньана сылдьар, кинилэр атырдьах ыйын 30 күнүгэр төннүөхтэрэ. 70 оҕолоох иккис бөлөх Владивосток «Океан» киинигэр атырдьах ыйын 20 күнүгэр көппүтэ. Үһүс бөлөх сарсын, атырдьах ыйын 26 күнүгэр, Крымҥа «Артек» уонна балаҕан ыйын 1 күнүгэр «Орленок» лааҕырдарыгар айанныахтара.