Соторутааҕыта Горнай улууһун Бэрдьигэстээҕэр эдэр кэрэспэдьиэннэр сүлүөттэрэ буолла. Манна аҕыс хамаандаттан 24 эдкор кыттыыны ылла. Биһиги, Үөһээ-Бүлүү улууһун Далыр оскуолатын «Далыр кыымнара» пост бэрэстэбиитэллэрэ, элбэх саҥаны биллибит, сонун сатабыллары баһылаатыбыт.
Айаммыт ыраах буолан, өрөбүл күн 9 чаастан айаҥҥа туруммуппут уонна Бүлүү улууһун уҥуордаан, Горнайга киэһэ сэттэ чааска тиийбиппит. Төрөппүттэрбит хонор сирбитин эрдэттэн кэпсэтэн, биир дойдулаахтарбыт Мария Николаевна, Евдокия Александровна, Анна, Семен Степановтар сылаас мичээринэн, минньигэс астаах сандалынан үөрэ-көтө көрсүбүттэрэ. Онон санаабыт көтөҕүллэн, настарыйыанньабыт үрдүү түспүтэ.
Сарсыардаттан гимназияҕа тиийэн регистрацияламмыппыт, оҕо бөҕө мустубут этэ. Сүлүөтү үөрүүлээх арыйыыга Горнай улууһун үөрэҕириитин начальнига В.И. Сметанина, гимназия дириэктэрэ П.А.Петров, «КЭСКИЛ» хаһыат дириэктэрэ О.И. Семенова уо.д.а. дьон тыл эппиттэрэ. Хас биирдии хамаанда “визиткаларын” көрдөрбүтэ интэриэһинэй этэ. Ол кэннэ күрэхтэһиилэр саҕаламмыттара.
Сахалина Илларионова, Жульяна Тимофеева, Настя Саввинова мультимедийнай журналистика чемпионатыгар кыттыбыттара. Онно «КЭСКИЛ» хаһыат рубрикаларынан лонгрид оҥорор сорудах турбута. Лонгридка тиэкис, хаартыскалар, видео-устуу киирэр. Ону барытын ситимниэххэ, монтажтыахха наада этэ. Биһиги оҕолору видеоҕа устан, хаартыскаҕа түһэрэн, интервью ылан, эбиэккэ диэри матырыйаал хомуйбуппут. Эбиэккэ олохтоох гимназия корпоһун салайааччыта Мария Ивановна Ноева кафеҕа сирдээбитэ. Кафелара Духуобунас киинин иннигэр турара. Бу кэмҥэ олонхоҕо улуустааҕы тэрээһин буола турар буолан, оҕо-аймах, улахан да дьон, элбэх этилэр.
Эбиэт кэнниттэн кыргыттар лонгриттарын монтажтаабыттара. Чемпионакка кыттыбат оҕолорго «КЭСКИЛ» хаһыат үлэһиттэрэ А.И. Ксенофонтова, Т.И.Алексеева маастар-кылаас ыыттылар, куонкурустарын туһунан кэпсээтилэр. Яра Степанова, Чэмэлиийэ Семенова, Айгуль Ломпордурова наһаа интэриэһиргээн иһиттибит, элбэххэ үөрэннибит.
Чемпионат түөрт чаас саҕана бүтэн, жюри түмүк таһаарарын кэмигэр оҕолор “Кэскил” хаһыат рубрикаларынан квест-оонньууга кытыннылар.
Дьэ, долгутуулаах түмүктүүр тэрээһин буолла. Биһиги хамаандабыт сорудаҕын үс чааска бүтэрэн, «Сорудаҕы саамай түргэнник толорбут хамаанда» диэн номинацияны ыллыбыт! Маны таһынан, «Бастыҥ оператор» номинацияҕа кыайан, үөрүүбүт өссө үксээтэ.
Араас бырагыраамаларга үөрэппит информатика учууталыгар А.В.Акимовка, бу сүлүөккэ илдьэ сылдьыбыт, элбэх саҥаны билиһиннэрбит эдкор-куруһуок салайааччыта Н.П.Семеноваҕа, суолбутугар көмөлөспүт дириэктэрбит М.Р. Семеновка улахан махталбытын тиэрдэбит.
Бу сүлүөттэн элбэҕи көрдүбүт-биллибит, бириэмэни туһалаахтык атаардыбыт, уопут ыллыбыт. Ол барыта инникибитигэр туһалаах буолуо диэн эрэнэбит. Биһиги маннык сүлүөккэ маҥнайгыбытын сырыттыбыт. «КЭСКИЛ» үлэһиттэригэр барҕа махтал, үлэҕитигэр ситиһиилэри! Өссө да маннык үчүгэй тэрээһиннэргэ ыҥыра туруҥ!
Ааптар: Сахалина Илларионова, 10 кылаас.