Бүгүн Наука эйэ уонна сайдыы иһин аан дойдутааҕы күнэ бэлиэтэнэр. Горнай улууһун Бэрдьигэстээх гимназиятын үөрэнээччилэрэ наукаҕа бастакы хардыыларын оҥороллоругар учууталлара улахан үлэни ыыталлар. Саха тылын уонна литэрэтиирэтин учуутала, Ай-тал эдкорпост салайааччыта Мария Ивановна Ноева оҕолорун чинчийии, айымньы эйгэтигэр сирдиир.
Сильвия Сивцева, 10 кылаас:
Чинчийэр үлэни суруйуубун 6-с кылаастан саҕалаабытым. Онно умсулҕаннаах үлэҕэ көҕүлээбит учууталбынан саха тылын уонна литэрэтиирэтин учуутала Мария Ивановна Ноева буолар. Бииргэ хасыһан, хомуйан, бэчээттээн чинчийэр үлэбин суруйбуппут. Маҥнайгы ситиһиилэрим улуустааҕы уонна өрөспүүбүлүкэтээҕи күрэхтэһиилэртэн саҕаламмыта. Биир улахан ситиһиим диэн Мэҥэ Хаҥалас Майатыгар ыытыллыбыт Россиятааҕы научнай-практическай кэмпириэнсийэҕэ I истиэпэннээх дипломунан наҕараадаламмытым. Чинчийэр үлэбин өссө да салҕыам диэн эрэнэбин. Үрдүк ситиһиилэргэ тардыһарбар чинчийэр үлэм тирэх буолар.
Арина Герасимова, 9 кылаас:
Мин наукаҕа бастакы хардыыларбын үһүс кылаастан саҕалаабытым. Бастакы саамай улахан ситиһиим — 4 кылааска Москва куоракка Россиятааҕы «Эйдос» кэмпириэнсийэҕэ лауреат буолбутум. Атын кыттааччылар үлэлэрин көрөн, оҕолору кытта билсэн, оҕо сайдарын, саҥаны билэрин онно билбитим. Билигин мин сыл ахсын өрөспүүбүлүкэтээҕи, Россиятааҕы НПК-ларга көхтөөхтүк кыттабын, миэстэлэһэбин.
Билиҥҥи бириэмэҕэ коронавирус турбутуттан сылтаан, барыта тэйиччи ньыманан ыытыллар буолбута хомолтолоох, ол эрээри эмиэ да үчүгэй, тоҕо диэтэххэ, үөрэнээччилэр өрөспүүбүлүкэтээҕи, Россиятааҕы эрэ НПК-ларга буолбакка, ону таһынан аан дойдумааҕы кэмпириэнсийэлэргэ куйаар ситиминэн кыттар буоллулар.