Россияҕа биллэриллибит Оҕо саас уон сылларыгар (”Десятилетие детства”) аналлаах “Наше десятилетие” оҕо хамсааһынын сүлүөтэ ааста. Форум биир бэлиэ түгэнинэн 2019 сыл быстыҥ актыбыыстарын наҕараадалааһын буолла. «Бастыҥ эдэр кэрэспэдьиэн» аатын Бэрдьигэстээх гимназиятын 11 кылааһын үөрэнээччитэ, «Кэскил» хаһыат эдкора Вика Агеева ылла.
Вика кыра эрдэҕиттэн «Кэскил» хаһыакка суруйар, Мария Ноева салалтатынан үлэлиир «Ай-тал» пресс-кулуупка дьарыктанар. «Пять шагов до МИИ» кыайыылааҕа, улуустааҕы WorldSkills куонкурус «Мультимедийная журналистика» компетенциятын призера. Сыл аайы математика, нуучча тыла, география, экономика, саха тыла уонна литература олимпиадаларыгар миэстэлэһэр. Улуустааҕы «Ученик года» куонкурус «Лучший организатор детских дел» номинациятын кыайыылааҕа, оҕо хамсааһынын лидерэ.
“Кэскили” кытта доҕордоһуҥ!
Инновация, цифровой сайдыы уонна инфокоммуникационнай технология министерствотыттан махтал суругу тутан, «Кэскил» издательство үлэһиттэригэр уонна салалтатыгар махталбын тиэрдэбин. Мин кыра эрдэхпиттэн «Кэскил» хаһыат ыытар куонкурустарыгар, кэмпириэнсийэлэригэр, сүлүөтүгэр кыттан, бэйэбэр олус элбэҕи арынным, биллим-көрдүм, киһи быһыытынан сайынным. Аан дойду таһымнаах кэмпириэнсийэлэргэ эдкор быһыытынан үлэлээбитим миэхэ элбэҕи биэрдэ.
Норуоттар икки ардыларынааҕы интеллектуальнай оонньууга, Азиатскай-Тихоокеанскай кэмпириэнсийэҕэ араас улуус оҕолорун кытта биир хамаанда буолан, хаһыакка, сайтка анаан матырыйаал бэлэмнээн, видео устан, интервью ылан, сүүрэн-көтөн, түбүгүрэн үлэлээбиппит.
Бииргэ үлэлээбит, күүс-көмө буолбут дьоммор, «Кэскил» хаһыат үлэһиттэригэр Айыына Ивановнаҕа, Таисия Ивановнаҕа, Сардаана Игнатьевнаҕа махтанабын. Кинилэр сүбэлэрэ-амалара миэхэ тирэх буолаллар, туһалыыллар.
Мин «Кэскил» хаһыаты кытта кыра эрдэхпиттэн ыкса сибээстээхпиттэн олус диэн үөрэбин. Оҕолоор, “Кэскили” кытта доҕордоһуҥ! “Кэскилгэ” суруйтарыҥ! Куонкурустарыгар кыттыҥ!
Вика Агеева, Бэрдьигэстээх гимназията.