«Кэскил» («Бэлэм буол») хаһыат эһиил, 2021 сылга,тэриллибитэ 85 сылын бэлиэтиир. Бу кэм устата хаһыаты кытта үгүс учуутал үлэлээн, эдэр кэрэспэдьиэннэри ааҕыы-суруйуу эйгэтигэр сирдээн, иитэн-үөрэтэн таһаарбыта. Бүгүн Ньурба улууһун Күндээдэ орто оскуолатын 11 кылааһын үөрэнээччитэ Виолетта Корнилова учууталын, «Ньургуһун» эдкорпост салайааччытын Таисия Ивановна Иванова туһунан истиҥ-иһирэх суруйуутун бэчээттиибит.
Хас биирдии киһи оҕо эрдэҕиттэн олоҕун тухары ытыктыы саныыр киһилээх буолар. Миэхэ оннук киһинэн учууталым Таисия Ивановна Иванова буолар. Кини миигин орто сүһүөх кылаастан саха тылыгар үөрэтэр. Учууталым төрөөбүт тылын ис хааныттан ытыктыыр буолан, киэҥ билиилээх, сайаҕас санаалаах, тыла-өһө баай. Мин киниттэн санаабар санаа, күүспэр күүс эбинэр курдукпун. Кини курдук элбэх сахалыы тылы билиэхпин, саҥарыахпын, төрөөбүт дойдум, дьонум туһугар тугу эрэ туһалааҕы оҥоруохпун, патриот санаалаах киһи буолуохпун баҕарабын.
Таисия Ивановна уруоктара, билиҥҥи оҕолор этэллэрин курдук, «тоскаааа» буолбатахтар. Кини ис-иһиттэн күлүүлээх, интэриэһинэй баҕайы кэпсээннээх, сонуннаах буолар. Ол да буоллар, уруогу хаһан да ыспат, барыта орун оннугар. Учуутал диэн оннук буолуохтаах. Оҕолордуун биир тылы булан, билии биэрэрин хаһан да умнуо суохтаах.
Учууталым, алын кылааска сырыттахпына, «Саха мандаар саҥата» диэн тыл куруһуогар, араас таһымнаах олимпиалаларга кытыннаран, сэмэй ситиһиилэрдээхпит. Бу оҕо тыл өттүгэр сыстаҕас эбит диэн таайдаҕа. Онтон 8 кылаастан «Куорсун» оскуола хаһыатыгар,»Ньургуһун» постка эдкор буолбутум. Манна эрчиллэн, үлэлээн хаһыат, бэчээт туһунан элбэҕи да биллим.
Таисия Ивановна куруутун сүбэлиир, өйүүр, өйдүүр. Хас да күһүн «Ньурба күһүнэ» диэн литература күннэригэр сырытыннарбыта. Онно араас сиртэн кэлбит суруйааччылары истэн, тыл-өс култууратыгар үөрэннин, сайыннын диэн элбэххэ үөрэттэ.
Маны таһынан, нэһилиэкпит баһылыгын сорудаҕынан, «Күн сарыала» диэн ааттаах нэһилиэк хаһыата күн сирин көрбүтэ балтараа сыл буолла. Мин учууталым уонна олохтоох библиотека үлэһитэ Татьяна Аркадьевна хаһыат таһаарыытын миэхэ итэҕэйбиттэрэ. Мин онон киэн туттабын.
Учууталым туруоруммут сыалын эхайаан да толорон иһэр киһи, мин эмиэ оннук буолуохпун багарабын. Сотору кэминэн оскуоланы бүтэрэн, олох киэҥ аартыгар үктэнээри сылдьабын. Билигин мин иннибэр үөрэхпин үчүгэйдик түмүктүүр уонна сөбүлүүр идэбэр туттарсан киирэр улахан сорук турар.
Мин ытыктыыр учууталым Таисия Ивановна! Баҕарыам этэ, кытаанах доруобуйаны, элбэх дьоллоох түгэннэри! Оскуолабыт туһугар, Күндээдэбит туһугар бары үлэлии сылдьаҕыҥ.