Мэҥэ Хаҥалас Бэдьимэ оскуолатын «Бэдьимэ кэскилэ» эдкорпоһун Устиния Игнатьевна Попова уонна Екатерина Николаевна Попова салайаллар. Кинилэр оҕо бары өттүнэн сайдарыгар бары кыахтарын ууран үлэлээн, ааҕыыга ураты болҕомтолорун аныыллар. «Кэскил», «Юность Севера» хаһыаттарга, «Чуораанчык» сурунаалга сурутууну көпүппэккэ ыытар, тарбахха баттанар учууталларбыт буолаллар. Бу поска дьарыктаммыт оҕолор кыра эрдэхтэриттэн хаһыаты-сурунаалы доҕор оҥостон кэллилэр. ХИФУ математика уонна информатика институтун «Инновационные процессы и технологии обучении математике» педагогика хайысхатыгар магистрант Анна Захарова суруйар.
«Бэдьимэ кэскилэ» эдкорпоска дьарыктаммытым
Мин оскуолабын бүтэрбитим номнуо 5 сыл буолла. Оскуолаҕа үөрэнэр сылларбар элбэх куруһуоктарга, секцияларга сөбүлээн сылдьыбытым. Олортон биирдэстэрэ пресс-куруһуок этэ. Бу куруһуокка биһиги кылааспыт оҕолоро бары сылдьарбыт. Салайааччыбыт — Попова Устиния Игнатьевна.
Кыра эрдэхпиттэн библиотекаҕа сылдьарбын, кинигэ, хаһыат ааҕарбын сөбүлүүр буоламмын бу куруһуокка тута астына дьарыктаммытым.
«Кэскил» хаһыакка, улуустааҕы «Эркээйи» хаһыаппытыгар бииргэ дьарыктанар оҕолорбутун кытта элбэхтэ суруйар, оскуолабыт, бөһүөлэкпит олоҕун сырдатар этибит. Оскуолаҕа “Алтан чуораан” диэн хаһыаты таһаарарбыт. Улууска Августина Владимирова таһаарар кинигэлэригэр хаста да бэчээттэммиппит. Мин “Тураҕас сэргэ” диэн айымньыны ырытыым Иннокентий Михайлович Сосиҥҥа аналлаах «Сайаҕас санаалар» диэн хомуурунньукка тахсан турардаах.
“Кэскил” хаһыат ыытар куонкурустарыгар, викториналарыгар көмөлөөн көхтөөхтүк кыттыыны ылааччыбыт. Хаһыаты суруйтарыыга бары көхтөөхтүк кыттарбыт. Корреспондент оҕолор оскуолабыт кинигэтэ бэчээттэнэригэр көмө буолбуппут, ахтыы хомуйан Ким Романович Аргунов салайааччылаах “Ровесник” үлэ-сынньалаҥ лааҕырын туһунан хомуурунньук оҥорбуппут.
Пресс-куруһуокпут оскуолаҕа үөрэммит сылларбытын өссө умсугутуулаах, интэриэһинэй оҥорбута. Салайааччыбытыгар Устиния Игнатьевнаҕа эдкордар ааттарыттан барҕа махталбытын тиэрдэбин.