Бэс ыйын 1 күнүгэр “Россия – мин историям” историческай пааркаҕа «Бэлэм буол» — «Кэскил» хаһыат 85 сыла быыстапка үөрүүлээх арыллыыта ыытылынна. Тэрээһин ыалдьыттарынан Ил Түмэн дьиэ кэргэн уонна оҕо аймах дьыалаларыгар сис кэмитиэтин бэрэссэдээтэлэ Алена Николаевна Атласова, СӨ үөрэҕин уонна наукатын миниистирэ Михаил Петрович Сивцев, СӨ инновацияҕа, цифровой сайдыыга уонна инфокоммуникационнай технологияҕа миниистирин солбуйааччы Геогрий Петрович Андреев, өрөспүүбүлүкэтээҕи “Юные якутяне” ресурснай киин дириэктэрэ Варвара Альбертовна Васильева, А.П. Гайдар аатынан оҕо библиотекатын сүрүннүүр педагог-библиотекара Мотрена Егоровна Охлопкова уонна өрөспүүбүлүкэ араас оскуолаларыттан юнкорпост салайааччылара буоллулар.
Быыстапка арыллыыта өрөспүүбүлүкэҕэ «Чуораанчыктан» — «Кэскилгэ» диэн сүрдээх дириҥ ис хоһоонноох үтүө хамсааһынтан саҕаланна. Мэҥэ Хаҥалас улууһун В.П. Ларионов аатынан Майа орто оскуолатын IV «Г «кылаас коллектива бастакы кылаастан төрдүс кылааска диэри «Чуораанчык» сурунаалы биир да нүөмэрин көтүппэккэ сурутан, ааҕан кэллилэр. V-с кылааска тахсаары тураннар IV «Г-лар бары тутуспутунан «Кэскил» хаһыакка суруйтардылар. Кылаас салайааччыта Александра Антоновна Борисова «Кэскил» хаһыакка суруппут квитанциятын V кылааска ылар учууталга Петухова Анна Александровнаҕа туттарда. Бу үтүө үгэс ситимин быспакка салҕана туруо диэн эрэнэбит.
Мотрена Егоровна Охлопкова, Дьокуускай куорат биир кииннэммит библиотекаларын тиһигэр баар А.П.Гайдар аатынан оҕо бибиотекатын сүрүннүүр педагог — библиотекара :
— » Кэскил » оҕо бэчээтин кыһатын кытта биир ситимнээх үлэбитин 2011 сылтан бииргэ буолан араас тэрээһиннэри ыытабыт. Оҕо ааҕар эйгэтин тэрийэр соруктаах, бастатан туран оҕо сурунаалларыгар уонна хаһыаттарыгар сурутууну бииргэ ыытан кэллибит. Быйыл биир сонун түгэнинэн, «Юность Севера» хаһыаппыт научнай — образовательнай хайысхалаах бэртээхэй сурунаал буолан кэллэ. Ордук науканан дьарыгырар үөрэнээччилэргэ бу улахан көмө- тирэх буолуоҕа.
Мотрена Егоровна Национальнай библиотека салалтата туһаайан туран эҕэрдэлээбит Грамоталарын туттартаата.
«Кэскил» хаһыат 85 сыллаах үбүлүөйүнэн бэтэрээн үлэһиттэргэ, юнкор пост салайааччыларыгар Ил Түмэн Махтал суруктарын, СӨ үөрэҕин уонна наукатын, СӨ инновацияҕа, цифровой сайдыыга уонна инфокоммуникационнай технологияҕа министиэристибэлэриттэн Бочуоттаах Грамоталары үөрүүлээх быһыыга-майгыга туттардылар.
