Бүгүн, от ыйын 2 күнүгэр, 3х3 баскетбол көрүҥэр чемпион үрдүк аатын ылбыт Беларусь кыргыттарын хамаандатын капитаныттан Марта Головачтан бэлэмнээбит боппуруостарбар эппиэттииригэр көрдөстүм. Баскетболист кыыс, төһө да финал кэнниттэн астыныы-дуоһуйуу иэйиитигэр сырыттар, мин ыйытыктарбар түргэнник эппиэттээтэ. Марта Олимпийскай эрэллэр оскуолаларын үөрэнээччитэ эбит.
— Баскетболга хайдах кэлбиккиний?
— Кэпсээтэххэ уһун. Икки тылынан этэн көрүөм. Аҕам биллэриини көрбүт этэ, кини миигин баскетбол секциятыгар киллэрбитэ. Онтон ыла баскетбол мин олохпор киирбитэ.
— Хаһааҥҥыттан, ханна сылдьан дьиҥнээхтик баскетболунан дьарыктанан киирэн барбыккыный?
— Минск куоракка «Горизонт» диэн баскетбольнай кулуупка саҕалаабытым. Онно спортивнай карьерам саҕаламмыта.
— Тренериҥ туһунан тугу кэпсиэҥ этэй?
— Мин элбэх тренердана сылдьыбытым. Билигин дьарыктыыр тренерым Наталья Валерьевна Нуфриенко. Кини аҕыйахта дьарыктаата, ол да буоллар аҕыйах кэм иһигэр үчүгэйдик билистибит, элбэххэ үөрэттэ. Кини үөрэҕэ-такайыыта баар буолан, биһиги дойдубутугар кыһыл көмүс мэтээл киллэрдибит, бастакы миэстэ буоллубут.
— Төрөппүттэриҥ эйигин быһа көрдөрүүлэринэн көрдүлэр дуо? Хайдах эйигин өйөөтүлэр?
— Быһа биэриини чугас дьонум бары көрбүттэрэ, телефонунан эмиэ кэпсэтэ сылдьыбыттара, долгуйбуттара, күүс-көмө буоллулар.
— Хамаандаҥ туһунан кылгастык кэпсиэҥ дуо? Чугастык доҕордоһоҕут дуо?
— Бастакынан, биһиги хамаанда күүстээх характердаах хамаандабыт. Онтукайа суох кыайыа суох этибит. Иккиһинэн, бары бииргэбит, олус үчүгэй хамаандам. Бииргэ түмсүүлээх буоламмыт кыайыыны ситистибит.
— Үөрэххин уонна спорду хайдах дьүөрэлиигиний?
— Оскуолам олимпийскай эрэллэр оскуолалара буолан үөрэхпит иккис миэстэҕэ турар. Сүрүнэ диэн спортка үчүгэй ситиһиилэри, түмүктэри аҕалыахтаахпыт.
— Бииргэ үөрэнэр оҕолоруҥ ситиһиилэргин кэтииллэр дуо?
— Көрөллөр, тэҥҥэ үөрэллэр-көтөллөр. Күрэхтэһиилэр кэнниттэн хайгыыллар, бэйэм даҕаны кинилэри хайгыыбын. Бары биир оскуолаҕа үөрэнэбит.
— Олоххор сыалыҥ тугуй?
— Үчүгэй спортсмен буолуохпун баҕарабын.
— Эппиэттээбиккэр иһин махтанабын. Ситиһиилэри!
Ити курдук Беларусь баскетболистара: уолаттара да, кыргыттара да бү күн кыайыы өрөгөйүн биллилэр. Ыраахтан кэлбит ыалдьыттарбыт ситиһиилэрин биһиги тэҥҥэ үллэстэбит. Ким күүстээх — ол кыайда!
Алгыстаана Захарова, оҕо-пресс киинин эдкора.
keskil14.ru